الفنان علاء عوض نجم الكوميديا وحوار خاص مع عالم النجوم 

إعداد / نهى مرسي .. حوار / دعاء نصر

الفنان علاء عوض ممثل مصري ولد في عام 1960، شارك بالتمثيل في العديد من الأدوار البارزة والمتميزة، قدم في بداية مشواره الفني العديد من الأدوار الفنية البارزة، كان من بين هذه الأدوار عندما شارك في فيلم حدوتة مصرية والمولد وحالة تلبس والأبرز مستر كاراتية، معروف عند بعض من الجماهير بشنكل ابن شناكل وذلك نسبة لأبرز أعماله الفنية عندما شارك في مستر كاراتيه مع النجم الكبير الراحل أحمد زكي. منها . شارك في ما يقارب من ١٠٠ عمل، كما شارك علاء عوض عدد كبير من نجوم الفن والمشاهير في العديد من الأعمال.

وقد شارك مؤخراً فى فيلم “الليلة الكبيرة” بعد أن عرض فى مهرجان القاهرة السينمائى بدورته 37، كما قام في عام ٢٠١٥ بأفتتاح مطعم طواجن كأول مشروع خاص له بعيدًا عن الفن.
غاب عن السينما وعاد عام ٢٠١٥ بمسلسلي “الركين”، و”دهشة”، ينتمي الفنان علاء عوض لجيل شريف منير ووائل نور وعبد الله محمود وحسن الأسمر و عمرو دياب، لكنه لم يستمر في الفن كما بدأ عندما شارك مع والده نجم الكوميديا الشهير “محمد عوض” في عدد من الأعمال ثم اشتراكه مع أحمد زكي ومحمود عبد العزيز ويحيي الفخراني وغيرهم من النجوم الكبار في أعمالهم.

الفنان الكوميديان علاء عوض ابتعد عن الشاشة وغاب 10 سنوات ما السبب وراء هذا الغياب ؟

انا عمري ما غبت 10 سنين ولا حاجة بس أكيد بيكون في أسباب فنية، وأسباب شخصية للغياب والأسباب الشخصية دي بتكون عند كل الناس في وقت يكونوا قادرين يشتغلوا وفي أوقات لا، الأسباب الفنية ان انا راجل متربي أنا واخواتي الاتنين عادل وعاطف خريجي أكاديمية فنون و تربينا على أن الفن للفن وليس للفلوس او لأي شئ آخر، فطبعا أنا لما باجي أشتغل اتعودت على مستوى معين من الشغل، فطبعا مش بقدر أقل ولما بقل بعمل حاجات صغيرة لحاجات معينة انا عارف انها مميزة وهتعلم مع الناس

فأنا وبقراها ببقي عارف أنا هعملها ازاى تقريبا ومع المذاكرة بعملها كاركتر حلو يعني حاجة مميزة، فمش غياب 10 سنين ولا حاجة انا موجود حتى في فترة الثورة دي كلها من 2011 لغاية دلوقت عملت حاجات كتير، وعملت صرخة نملة 2011 وعملت الركين بعدها وعملت دهشة بطولة مع الدكتور يحيي الفخراني، ده مسلسل قوي جدا وعملت “الليلة الكبيرة” فيلم ، وعملت “رسائل” و “الركين” وعملت مسرحية ناجحة جدا قعدنا حوالي 4 شهور في اسكندرية أسمها “أبو كبسولة” يعني أنا موجود وشغال والحمد لله وعملت “رسائل” كان قريب مع مي عز الدين وادعيلي بقي في اللي جاي ان شاء الله. 

هل تتذكر كواليس اول يوم تصوير وأجرك كان كام ؟

أول يوم تصوير هو الحقيقة انا متفاجئتش بالكاميرا أحنا كأولاد عوض اتربينا في كواليس المسارح كنا احنا دايما متواجدين، سواء ايام المسرح العائم او لما خدنا مسرح الزمالك أحنا دايما في الكواليس، ودايما كنا معاه في مكان التصوير من زمان أوي من واحنا أطفال وعشرنا النجوم الكبار واحنا اطفال، وبعدين أنا وعاطف داخلنا معهد البالية من وأنا عندي 10 سنين وانا اثناء ما كنت في معهد البالية كنت بعمل برامج اطفال في التليفزيون المصري، مع أحمد سلامة ومحسن محي الدين وعبدالله محمود الله يرحمه، وممدوح عبد العليم كان سابقنا بشوية وليلي علوي كنا بنعمل برامج اطفال

 وكنا بناخد أجور رمزية جدا وبعدها لما خلصت معهد البالية درست حوالي 12 سنة في معهد البالية وبقيت راقص اول فرقة بالية القاهرة، حولت أوراقي كلها بمعهد فنون مسرحية وابتديت اول افلامي كان “حدوتة مصرية” مع الاستاذ يوسف شاهين كان اول مسلسل ليا “أخو البنات” الأستاذ محمد فاضل كان حظي حلو ان ابتدي سينما مع الاستاذ يوسف شاهين، وابتدي تليفزيون الاستاذ محمد فاضل من كبار مخرجين مصر فكان حظي حلو .

وأستكمل علاء عوض حديثه قائلا : 

فكان اول مشهد ليا في فيلم “حدوتة مصرية” مع الاستاذ يوسف شاهين، كنت متجهز كويس 500٪ الأستاذ يوسف شاهين كان بيجهز الناس بتاعته هما مشاهدين كنت بعملهم ابن الأستاذ نور الشريف، فكنت متجهز نفسيا وفنيا وكل حاجة بمجهود ضعيف مني، لان هما كانوا مجهزني تجهيز تام فكانت المأمورية سهلة وانا كنت متعود بعمل برامج اطفال، وبشتغل في مسرح أبويا ومعاشر فنانين من صغري، فنانين كبار فيعني المسألة مكنش ليها خضة فطبعا اول يوم تصوير كان محمد منير موجود، كانت الاستاذة ماجدة الخطيب الاستاذة يسرا الاستاذة سهير البابلي،  وكان حضرنا مشهد في استوديو جلال أيام يوسف شاهين الله يرحمه وتوالت الأعمال. 

اشتهرت بين الجماهير بأسم شنكل ابن شناكل في فيلم مستر كارتيه ، كلمنا عن كواليس هذا الفيلم مع النجم أحمد زكي ؟

بخصوص شنكل ابن شناكل السينما المصرية بيسموني شنكل السينما المصرية الحقيقة شنكل ده ليه قصة لطيفة جدا معايا، وأنا اتعلمت منه ان اللي تخاف منه ميجيش احسن منه فعلا، فأنا في الفيلم ده مكنتش بلحق اعمل أمثل خالص انا كان اول فيلم ليا كان مخرج استعراض كان ترشيح الاستاذ احمد ذكي نتيحة تعارفنا مع بعض قبل كده زمان في فيلم “الاحتياط واجب” كنت أنا وشريف منير، ووائل نور وعبدالله محمود وكنا شلة كبيرة يعني

وكان معانا أحمد زكي وكان هو القيادة على المجموعة دي كان زي مدرسة المشاغبين كده وكنت رقصت في الفيلم ده شوية، وكنت انا مشهور رقص شاطر جدا فهو رشحني للاستعراض او استخراج الاستعراض انا بحب اسميه “استخراج الاستعراض” مش بحب انا اسميه تصميم الاستعراض لان ليا وجهه نظر ف ده بس ده مش موضوعنا حالا، المهم روحت عملت استعراض في 26 يوليو في الزمالك في منطقة صعبة جدا الساعة 9.10صباحاً، والأستاذ أحمد زكي واقف وأنا معايا حوالي 60 راقص وراقصة كان عدد رهيب

أستكمل الفنان علاء عوض حديثة قائلا :

وكان طلبات الاستاذ محمد خان مخرج الفيلم العظيم طبعا الله يرحمه كان طلباته ان ميحسش ان الأستاذ أحمد زكي بيرقص وعايز يحس ان ليا انسجام بينه وبينه الشعب، وأنهم بيتحركوا بتلقائية فكان التنفيذ يعني مش سهل أبدًا الحقيقة لما أعجبوا بالاستعراض فعرضوا عليا دور “المنادي”، كان اسمه المنادي مكنش له اسم فأنا اعترضت في الاول فألأستاذ احمد ذكي والأستاذ خان خدوني علي جانب قالولي بص ياعلاء انت متبصش علي ورق والأستاذ احمد زكي، قالي انت بتثق في رأيي قولتله طبعا، قالي السكونس ده هيبقي سكونس ارتجالي هنرتجل أنا وانت وده هيعلم معاك اوي مع الناس دا معايا ياواد ياعلاء، دا معايا انا، قولتله حاضر ووافقت على الرغم مكنتش مبسوط ان انا موافق بس تحت ضغط استاذ احمد زكي، والأستاذ محمد خان ورضيت وبعد كده اكتشفت ان الناس دي عندها رؤية

وبعد نظر وان الحقيقة لما جه يديني القلم قالي انا هطبق ايدي كده بحيث لما اديك القلم يطرقع من غير ما يوجعك، فانا قولت له ياأستاذ أنا عاوز قلم يضايقني، فهو فعلا لما اداني القلم بقوة أنا استفزيت، ولقيت نفسي برتجل وبجري وبزعق وانا شنكل ابن شناكل وبقطع القميص، وبنط مش عارف منين كل ده مكنش مكتوب والحمد لله ربنا وفقنا فيه، واصبح علامة مهمة جدا في حياتي رغم ان هو صغير وانا تعلمت منه ان الدور فعلا مش بحجمه، ان الدور بأفاكت بتاعه وتأثيره علي الناس ودا درس ليا ولكل الأجيال الجديدة احب ان انا أقولهالهم . 

لو لم يكن والدك الفنان الكوميديان الكبير محمد عوض ممثل هل كنت ستفكر في دخول هذا المجال ؟

بصي حضرتك هو أي ابن بيتعلم من باباه المهنة سواء امتهنها أو لم يمتهنها ومش هتلاقي ودايما يقولك ما في اولاد فنانين كتير ابوهم طلعوهم، حتى لو افترضنا ان في فنانين وفعلا في فنانين اهاليهم  عملوهم بس دا استحالة تلاقي ابن فنان مش شاطر فمش صعب، اذكري لي اسم وممثل او حتي مخرج ابن مخرج اي فنان ابن فنان مش طالع شاطر زي بباه، فصعب تلاقي حتي لو مش بيشتغل كتير بيبان تميزه وبعدين ان كنا مقتنعين كأسرة أن لا وساطة في الفن ابونا ربانا على كده، إحنا الثلاثة اتخرجنا اكاديمية فنون انا وعادل وعاطف خريجي أكاديمية فنون ودراستنا وممارستنا للعمل الفني من صغرنا، كلنا خلتنا كلنا شطار في شغلنا ولو مكنتش اشتغلت في الفن فكنت هتذوقه بنسبة عالية وفهمه بنسبة كبيرة وهحسه . 

قمت بالعديد من الأدوار ماهي الاعمال المحببة إلى قلبك ؟ 

الحقيقة انا عندي كتير شغل هيي الناس بتعقد ان أنا عندي شغل قليل لكن الحقيقة انا عندي القرب من 100 عمل، ما بين المسرح والسينما والتليفزيون وعندي رصيد سينمائي كبير على فكرة آخرهم كان “الليلة الكبيرة” دا كان سامح عبد العزيز بطولة حوالي 28 نجم ونجمة، أنا بحب إيه اكيد الناس بتحب حاجة وانا بحب حاجة لان أنا عندي دورين أنا بحبهم جدا جدا و هما مش بيكون الدور كوميديان أو ترجيديان بيكون في مشاعر كبيرة علشان كده، انا بحب الادوار اللي بيكون فيها اكتر من احساس واكتر من شخصية بتتغير معاك وانت بتشتغلها كان زمان في مسلسل اسمه “ثمن الخوف”،

أستكمل قائلا : 

كان مع الأستاذ نور الشريف والاستاذة هالة فؤاد كان الأستاذ جميل راتب كان الميكانيكي بتاعي، وأنا صبي الميكانيكي كان اول مرة يعمل ميكانيكي، وكنا كابل قوي جدا وكان فى بقى الأستاذ منتصر بالله والاستاذ شوقي شامخ وإبراهيم خان، كان مسلسل ضخم جدا كان اسمه “ثمن الخوف” كان اخراج الاستاذ احمد فؤاد، أنا بحب دوري فيه جدا و عملت حاجات كتيرة بعدها بس اوقفت عند مسلسل “دهشة سنة 2016” مع الدكتور يحيي الفخراني كان دور بطولة مهم جدا في مسلسل “دهشة” كان الاستاذ عبد الرحيم كمال تأليف واخراج شادي الفخراني، الحقيقة دور صعب وأنا عملته بتركيز شديد جدا، وانا بعتبره اسمه “زعبر دا شويش القرية زي غفير القرية فبحب الدور ده لان كان دور كوميدي في الاخر إنساني جدا زي دوري في “تمن الخوف” لان بيروح لاكتر من مشاعر وبيبقي فيه صعوبة في الاداء فباقية شغلي كله سهل وسلسل ان ادية وممكن اعمل نفس الادوار باشكال تانية مختلفة. 

أشتغلت مع العديد من النجوم الكبار من الفنان الذي كنت تتمني العمل معه ولم يحالفك الحظ ؟

أنا أشتغلت مع معظم نجوم الإخراج ومعظم نجوم التمثيل في الإخراج ( يوسف شاهين، محمد خان، وخيري بشارة، أشرف فوزي، وعادل عوض، وسمير سيف) يعني أشتغلت مع اقوي مخرجين سينما في مصر وفي في التليفزيون كذلك واشتغلت مع الاستاذ اسماعيل عبد الحافظ، في “الوسية”

واشتغلت مع الاستاذ محمد فاضل واشتغلت مع الاستاذ جمال عبد الحميد، ومع إبراهيم الشقنقيري واشتغلت مع اقوي مخرجين فى التلفزيون بس يعني طبعا اكيد مش كله في التمثيل بقي مع الأستاذ أحمد زكي، والأستاذ نور الشريف والاستاذ عادل امام في فيلم اسمه “المولد” واشتغلت مع معظم نجوم مصر من السيدات أيضا نجلاء فتحي، في التمثيل برده مع معظم النجمات وشويكار وفي أعمال المسلسلات اشتغلت مع نجمات كتير جدا، معظم نجمات الوسط يعني مفيش مع حد معين ومشتغلتش

أنا كان نفسي مثلا اشتغل مع الاستاذ احمد زكي، واشتغلت مع الاستاذ محمود عبد العزيز واشتغلت مع الأستاذ نور الشريف  واشتغلت طبعا مع بابا بعد ما اتعرفت اوي اشتغلت كمحترف يعني كان نفسي اشتغل مسرح أكتر مع كوميدينات أكتر دا يعني ممكن اللي ينقصني مشتغلتش مسرح كتير اوي مشتغلتش مسرح بمعنى المسرح ان أنا دوري أبان فيه واتشاف فيه عملت وعملت حاجات كويسة بس لا يكفي كان ممكن اعمل اكتر من كده مجتش الأدوار اللي تغريني على المسرح.  

علاء عوض ما هو سر ما وراء افتتاح محل طواجن ؟ 

الحقيقة أن اي فنان لازم يكون عنده مشروع يعمله في حياته لازم علشان يعمل فن جيد ويبقى ومهما كان هو محترف، يتعامل مع الوسط كهاوي بمعنى أن يكون عنده حاجة بتجيب فلوس ماديا يكون مرتاح ماديا عشان ميضرش يعمل عمل فني غصب عنه الفلوس ف ده بيبقي هدف في الحقيقة، انا معملتوش للفلوس انا عملته لان كنت بلاقي وقت كتير عندي فاضي وعندي طاقات كتير وعاوز أخرجها في حاجة قولت اعمل موضوع المطعم ده والحقيقة اشتغلت فيه لمدة سنة واتسرقت جامد جدا جدا ومكملتش المفروض اللي انا اعتمدت عليهم اصحابي بتوع السياحة مطلعوش ناس 100٪ واتخنت فيه بمعني اوضح ومقدرتش اكمل. 

ما الأعمال التي قومت بها مع شقيقك المخرج عادل عوض ؟ 

الأعمال التي قومت بها مع عادل عوض استعراضات كام اغنية زمان في الاول خالص وقبل ما ادخل اعمل “مستر كاراتيه” عملت أربع أفلام، استعراضات برضه فيلمين للأستاذ أحمد زكي “مستر كاراتيه”، واستاكوزا، وفيلم للأستاذ محمود عبد العزيز “النمس”، وفيلم لمدام نبيلة عبيد، “عتبة الستات”، دول الاربع أفلام اللي انا عملتلهم استعراض مع عادل كان بداياتي ان عادل اغراني ان اعمل كام غنوة زمان كان بابا نويل مصطفي قمر ونيلي وحسن كامي ، وعملت معاه واحدة كمان لمدام لبلبة والأستاذ أحمد مظهر، كان ضيف شرف، كان والاستاذة مريم فخر الدين كانوا ضيوف شرف في الغنوة واخيرا عملت معاه من مدة، عملت انا ورندا أدوار مهمة في فيلم “تحت الصفر”

قصة وسيناريو وحوار الاستاذ اسامة انور عكاشة الله يرحمه، وكان اخراج عادل عوض وبطولة الاستاذة نجلاء فتحي الكبيرة، وصلاح السعدني ولطفي لبيب وكان في مجموعة كبيرة من الفنانين دا بخصوص شغلي مع عادل، وعادل وعاطف عملوا مع بعض فيلم كريستال عادل عوض وعاطف عوض عملوا فيلم كريستال وان شاء الله طول ما احنا عايشين ممكن نشتغل مع بعض في اي وقت سواء احنا الاثنين أو الثلاثة ان شاءالله ، وشكرا استاذة دعاء والف شكر لحضرتك وميرسي