حواراتعاجلعالم الفن

الفنانة عنبر: وكواليس مسلسل عفاريت عدلي علام للنجم عادل أمام 

الفنانة عنبر: وكواليس مسلسل عفاريت عدلي علام للنجم عادل أمام 

الفنانة عنبر: وكواليس مسلسل عفاريت عدلي علام للنجم عادل أمام 
الفنانة عنبر

إعداد وحوار /نهى مرسي 

الجزء الأول 

الفنانة عنبر ممثلة مصرية، أشتركت في العديد من الأعمال وقامت بعدة أدوار مختلفة تركت بصمة قوية وتعلق بها الجمهور لأتقانها في العمل وأحترافها في التمثيل ، عملت مع كبار النجوم منهم الفنان عادل أمام والفنان أحمد زكي والفنان محمد صبحي، درست النجمة عنبر علم النفس بكلية الآداب ثم إنتقلت لدراسة القانون بكلية الحقوق جامعة القاهرة. حيث كانت بدايتها مع التمثيل من خلال مسرح الجامعة. و حيث شاركت في العديد من المسرحيات، قبل أن تشارك عام 1996 في مسلسل (سر الأرض). ثم شاركت في العام التالي بمسلسل (حكايات مجنونة). وفيلم (صمت الخرفان)، توالت بعدها أعمالها مابين السينما والمسرح والتلفزيون، من أبرز أعمالها أنا وهؤلاء، السندريلا، حاحا وتفاحة، عفاريت عدلي علام، شطرنج، عفاريت محرز، مملكة الجبل، في إيد أمينة، والعديد من الأعمال الأخرى.

وفي لقاء خاص مع الفنانة عنبر في عالم النجوم أجرينا معها هذا الحوار:

– الفنانة المتميزة عنبر متى كانت بدايتك الفنية ؟

بدايتي الفنية كانت سنة اواخر 1996 دخلت الفن وكنت بشتغل في السياحة مجال الفنادق بعد ما اتخرجت من الجامعة، كلية الحقوق جامعة القاهرة

– دراستك كانت في علم النفس ثم الانتقال لدراسة القانون بكلية الحقوق فلماذا لم تعملي بمجال دراستك ؟

دراستي كانت في علم النفس وعلى فكرة أنا جايبة تقديرات وكنت شاطرة جدا في كلية الحقوق وقدمت دراسات عليا بعد ما خلصت لإني كنت جايبة تقدير ، لكن ساعات الظروف الحياتية وماما كانت كل حاجة بالنسبالي وانا اللي كنت مسئولة عنها وهي كانت صاحبة مرض فللأسف سحبت الأوراق بعد ما قدمت في الدراسات العليا؛ وبعد كده اتعرض عليا شغل في مجال السياحة والفنادق..

اشتغلت في السميراميس وفي المريوط وفي أكثر من أوتيل 5 ستارز.. ريسبشنست وجست ريليشن وأعدت فيهم فترة كبيرة أكثر من 6 أو 7 سنين وبعد كده اتاخدت بقا. وفجأة اتعرض عليا الدخول في الفن ، شافوني من خلال الشغل كان بيتعمل مهرجان الإذاعة والتلفزيون بتاع زمان بتاع قطاع الإنتاج.. وشافني منتجين .. استاذ “فيصل ندا” وأستاذ “واصف فايز” وقالولي انتي شكلك حلو ليه مبتمثليش .. واتعرض عليا شغل من خلال أستاذ “فيصل ندا” وأستاذ “واصف فايز” وخدوا تليفوناتي .. وكنت أنا حابة الحكاية من زمان من وأنا صغيرة إن أنا أطلع مذيعة أو ممثلة بس الدراسة والحياة خدتني لحاجات تانية ولغاية ما اتعرضت عليا تاني بالصدفة ومن هنا ابتدت

الفنانة عنبر: وكواليس مسلسل عفاريت عدلي علام للنجم عادل أمام 
الفنانة عنبر

– تميزتي في مسلسل عفاريت عدلي علام بطولة النجم عادل إمام كلمينا عن كواليس المسلسل ؟

كواليس مسلسل (عفاريت عدلي علام) مع النجم الكبير “عادل إمام” والمخرج “رامي إمام” أنا لما اترشحت للدور اترشحت من خلال الأستاذ رامي وطبعاً بموافقة النجم الكبير الأستاذ “عادل إمام” ، ولما بعتولي ورق المسلسل عشان أقرأه عايزة أقولك إن كان في مصادفة غريبة جداً إن أنا قبلها الحمد لله ملتزمة بالصلاة. وأنا بصلي قولت يارب بقا هو أنا مش هقف قدام “عادل إمام” في يوم من الأيام يارب تكتبلي نصيب إن أنا أشتغل معاه حتى لو دور صغير.. والله العظيم ده حصل ، قبلها بفترة في نفس السيزون إللي انا عملت فيه مع “عادل إمام” عايزة أقولك لم يمر أسبوعين تلاتة لقيت تليفون من الشركة بيقولولي إن أنتي مرشحة معانا في (عفاريت عدلي علام) مع النجم “عادل إمام” عايزة أقولك إن أنا صرخت في التليفون وقولت ايه ده بجد وقولت انت كريم وجميل أوي يارب.. فعلا ربنا جميل.

ربنا سبحانه وتعالى كل شئ مقدر وكل شيء مكتوب فلاقيتهم بيعرضوا عليا قولتلهم طبعا طبعا ابعتولي الورق بعتوا الورق ولاقيت الدور لطيف والدور جميل ؛ كفاية إن هو مع نجمنا الكبير اللي أي حد بيتمنى إن هو يشتغل معاه فوافقت على طول ورحت واتفقت .. أول يوم دخلت اشتغلت فيه كان نجمنا الكبير مكانش موجود .. أما ابتديت بقا الديكور الرئيسي بتاعي وكده قابلته وسلمت عليه .. عايزة أقولك كنت خائفة جدا جدا ومكنتش برضه أعرف أستاذ رامي لإن كان أول مرة أشتغل معاه .. لكن بأمانة هو حد جميل وعلى خلق وفنان محترم جدا ومهذب وبجد أنا سعدت. وشرفت بالعمل جدا جدا جدا معاه إنسان بمعنى الكلمة وفنان محترم وفنان كبير ربنا يكرمه .. وفعلا كنت سعيدة جداً جداً بالتجربة .. بالنسبة لنجمنا الكبير “عادل إمام “أول ما شافني سلمت عليه وقعد يتكلم لاقيته حد لطيف جدا.

وأكملت عنبر قائلاً

قعد سألني انتي خريجة ايه وانتي خريجة المعهد ولا لأ ومنين .. فقالي انتي فيكي طيبة باين على وشك الطيبة وحد جميل وإن شاء الله تنوري المسلسل فطبعا ده كان حاجة كبيرة جدا من نجمنا الكبير وأول ما اشتغلت كان أول مشهد ليا كان هو قاعد في اللوكيشن بس مكانش المشهد معاه ، كنت لسة مشتغلتش معاه.. كان مشهد بيجمعني بالفنان الكبير الجميل اللي أنا بحبه وبحترمه جدا ربنا يشفيه استاذنا الكبير “لطفي لبيب” فقعد يتفرج عليا وبعد ما خلصت قالي تعالي تعالي انتي مطلعتيش شكلك حلو بس انتي طلعتي كمان ممثلة شاطرة جدا. ولما ابتدينا نشتغل بقا كل الشغل فقالي على فكرة انتي عملتي الدور بشكل وأنا سعيد بيكي جدا وده كان إطراء طبعا على راسي من فوق من النجم “عادل إمام” ومن استاذ “رامي إمام” وبجد كانت تجربة جميلة وكانت الكواليس دمها خفيف. وكانت حاجة بتعدي كده زي النسمة بأمانة أنا مبسوطة جدا بالتجربة دي واتمنى إنها تتكرر طبعا تاني.

نهى مرسي

نائب رئيس تحرير الموقع
زر الذهاب إلى الأعلى