الفنان محمد الصاوي: بحب أشتغل مع أحمد بدير والفنانين كلهم حبايبي

إعداد وحوار / دعاء نصر

الفنان محمد الصاوي الكوميديان خفيف الظل، فقد اشتهر بتقديم الأدوار الكوميدية في العديد من الأعمال التي تخطت 300 عمل. ما بين الدراما التلفزيونية والسينما والمسرح. وشارك أيضا في تقديم الفوازير مع الراحل عبد المنعم مدبولي في “جدو عبده” و”العمدة الآلي”.

ومن أبرز أعماله الفنية: أسود فاتح مع الفنانة هيفاء وهبي، خيط حرير مع الفنانة مي عز الدين. ضربة معلم، أفراح أبليس، عائلة الحاج نعمان. الأب الروحي، ظل الرئيس، كلبش، والعديد من الأعمال الأخرى.

الفنان القدير محمد الصاوي ماذا عن أعمالك في رمضان؟

أنا حاليا معايا مسلسلين، مسلسل أوف سيزون خارج رمضان، مسلسل رمضان” المداح”. بطولة حمادة هلال الأستاذ أحمد بدير إخراج الأستاذ أحمد سمير فرج. وتأليف أمين كمال دا هيبقي رمضان وطبعا عبارة عن 30 حلقة بيتكلم عن المبدعين. وبيعمل ما بين الدين الحقيقي وبين المزيفين المدعين بالدين. هو في إطار اجتماعي لذيذ وأعتقد مش بنلمس فيه الدين أنه لغة عربية هو مسلسل باللغة العامية تماما. المسلسل الأخر أيضًا خارج الموسم الرمضاني اسمه ” الحرير المخملي ” إخراج أحمد حسن حوالي 60 حلقة بطولة مصطفى فهمي.

فيلم “المنزل رقم 13” دا اول فيلم 3D علشان تكلفته عالية جدا. المفروض كانت ينزل من 5:6 أشهر لكن المنتج منتظر لحد ما موضوع كورونا يخف. وترجع الاوضاع للسينما زي ماكانت هو فيلم رعب بطولة دينا الشربيني ومجدي كامل. وشريف منير ومجموعة كبيرة المتوقع ينزل في العيد. إخراج وإنتاج وائل عبدالله وشركة أوسكار.

هل في أعمال أخرى؟

فيه في المسرح حاليا بنشتغل 3 ايام في الاسبوع بتنتقل في محافظات أخرى زي دمنهور وبعدين في طنطا ومرسي مطروح هيلفوا بيها جولات بعد كده. بطولة فاطمة الكاشف واخراج محمد متولي وتأليف محمد الملواني ومنة المصري. ومحمود الهنيدي ابن آمين الهنيدي و نلف بيها المحافظات الفترة الجاية. وعلي الصيف احتمال كبير اوى ان أحنا نعرضها في اسكندرية دا بالنسبة للأعمال.

رأيك في المشاكل الموجودة علي الساحة الفنية ؟

أي منتج بيخاف ينزل عمله في ظل الظروف الموجودة وفي ظل التباعد الاجتماعي اللى موجود الـ 25٪ بتاع الكراسي فطبعا مش هتكون مربحة في الأخطر من كده القنوات اللي كانت واخده كام عدد من الفنانين زي صوت القاهرة قطاع الانتاج، مدينة الإنتاج الإعلامي كل دول كانوا بينتجوا، مش بينتجوا ليه مش عارف دي من الحاجات اللي برضه في فنانين كتير قاعدة في بيوتها أنا جت عليا فترة قعدت في بيتي سنة كاملة لأن كام من العمل، كنا بنعمل ما يقرب من 100 مسلسل في السنة لو اتعمل 25 مسلسل في السنة دا انجاز، نفسنا نعرف برضه ليه، الجهات دي اتقفلت، بتمنى ترجع تاني ويكون لها نظرة أخرى ونشوف ايه العوائق اللي خلتها توقف إذا كان في حلول تانية ليها ننظر للحلول دي ونشوفها وتستمر لأن عدد الفنانين أحنا مثلا في نقابة المهن التمثيلية مايقرب من 3300 فنان طيب دول يستوعبوا ازاي 20،25 المسلسل فبرده المشاكل دي تتحل.

وعن مشاكل السينما ؟

طبعا ظروف كورونا اللي بنمر بيها مأثرة علي السينما جدا يعني المسرح القطاع الخاص كان بيتعمل 20 مسرحية في القاهرة و 12 مسرحية في اسكندرية طبعا الظروف اللي بيمر بيها العالم كله العملية مش هتكون مربحة للمنتج لأن ملتزم ب 25 عدد من الكراسي وعنده التكلفة الإنتاجية عالية لحد ما مسرح الدولة، وأشرف عبد الباقي ده بعتبره مؤسسة لوحده بصراحة يعني راجل زي ده عشان يبقى عنده 3 مسارح انا بعتبره مؤسسة جريئة فظيعة وانا بحترمه جدا يمكن اول تجربة أنا خضتها معه كان في مسرح مصر كان لسه بينشأ الفرقة وكان كل اللي معاه محدش معروف فكان دايما بيجيب معاه وجوه معروفة شوية للجمهور، فأنا كنت سعيد جدا بالتجربة دي طبعا أنا كنت سعيد جدا بالتجربة دي طبعا نجحت جدا لان معظم الأعمال دي كانت بتتصور وتتعرض للاسف هيئة المسرح مش عارفه تعمل ده، انت بتعمل مسرحيات مش عارف تصورها ليه يعني كلنا مندهشين عن الكاست اللي كان مع اشرف عبد الباقي كانوا لسه بيبتدوا حياتها وهما اصبحوا الان نجوم لان الروايات دي اتصورت وأتعرضت وكل شوية جديد، أحنا مفتقدين ده في مسرح الدولة للأسف مش فاهم ليه الروايات دي مش بتتصور وكل ما نسأل هما نفسهم مش عارفين بتمنى فعلا الوزيرة الجديدة تتهتم لانها فنانة يعني كلنا بنتمنى أنها تتحرك، ليه الروايات دي مش بتتصور وبعدين في إتفاقيات مع التليفزيون المصري طيب ما دي جهة حكومية ودي جهة حكومية طيب إيه المانع ان الروايات دي تتصور اعتقد ان الأستاذة إيناس عبد الدايم تفك الشفرة دي.

حضرتك عملت مع كبار الفنانين والمخرجين والكتاب في فنان معين تتمني العمل معاه؟

انا بحب دايما أشتغل مع أحمد بدير وبالذات المسرح، والفنانين كلهم حبايبي وبحبهم وبيحبوني جدا فطبعا اتمني العمل مع الكثير، حتى الجيل الجديد اللي طلع ده كله أنا أشتغلت معاه يعني مفيش حد معين، ومن الناس إللي حبيتها اما اشتغلت معاها وكنت سعيد جدا، كانت ليلي علوي في الجميلة والوحشين مسرح وعملت معاها مسلسلين، يعني مش معلقة بحد معين، الحمد لله معظمنا كويسين وبنحب نتعامل مع بعضنا لكن من القديم نجيب الريحاني،اسماعيل ياسين، لحد الان بتفرج ع افلام إسماعيل ياسين ولادي بيبصولي ويقولولي انت ليه مطلعتش اسماعيل ياسين عشق الناس لإسماعيل ياسين مخلدة موجودة لحد الان الطفل بيحبه نجيب الريحاني كل الناس دي متتعوضش قول للزمان ارجع يازمان.

كلمة الفنان محمد الصاوي في عيد الأم ؟

أنا والدتي متوفيه بس أختي الكبيرة هي إللي مربيني هي بالنسبة ليا الأم التانية وطبعا عيد الأم احتفالية مصرية من قديم الازل فطبعا بتكون أيام جميلة جدا بيكون في تجمعات العيلة بقي، لي أخوات بكون مشوفتهمش بقالي شهرين فبنتجمع اليوم ده بالمنزل بتاع العيلة اللي اتولدنا فيه وعيشنا فيه في بعض، البيت اساسا كان بتاعنا لكن لما كل واحد اتجوز كل واحد أصبح في مكان بس احتفظنا ببيت العيلة واختي الكبيرة ساكنة فيه.