الكوميديان “فتحي سعد” في حوار خاص – سعيد بمشاركتي في العرض المسرحي “الدنيا مقلوبة”
حوار / آيه سالم
يشارك الفنان “فتحي سعد” في العرض المسرحي “الدنيا مقلوبة” للمخرج الشاب “مصطفى حمد” ، حيث يستعد المخرج “مصطفي حمد” لتقديم أقوى عروضه بفريقه الخاص و هو فريق “أون إستيدج” الذي يحتوي علي ألمع الشباب السكندري الواعد .
و في لقاء ممتع جمعني بالفنان الكوميديان “فتحي سعد” تحدثنا حول العرض المسرحي “الدنيا مقلوبة” و عن الفن في حياة النجم “فتحي سعد” ..
يليق الأدوار الكوميدية بالفنان “فتحي سعد” و يقدمها بإستمرار فلماذا حبك للون الكوميدي تحديداً ؟
لا والله هو طبيعة الممثل المفروض بيمثل كل حاجة تخص الفن لكن هو بيتصنف حسب الناس مثلاً بتشوفه إن هو أحلى في الكوميديا أكثر من الدراما أو هو بيستريح في إيه أو بيجيد إيه أكثر أو هو مثلاً دمه خفيف فبيشتغل كوميدي لكن في النهايه لازم الممثل يقدم أي حاجه تخص الفن .
قمت بتقديم الكثير من الأعمال السينمائية و الدرامية و المسرحية من منهم تفضله أكثر ؟
المسرح طبعاً لإن المسرح أبو الفنون و هو اللي علمنا إزاي نقف قدام كاميرا و كمان لإن المسرح بتاخد فيه حقك فوري يعني بتطلع في تفاعل مع الناس و كمان بتاخد تحيتك في ساعتها لكن الفيديو أو الكاميرا عادي يعني لو غلطتي بتعيدي تاني لكن المسرح إلتزام فالمسرح له بريق تاني .
هل الفنان “فتحي سعد” سعيد بالمشاركة في العرض المسرحي “الدنيا مقلوبة” للمخرج “مصطفى حمد” ؟
أعرب الفنان “فتحي سعد” عن مشاركتة بالعرض المسرحي “الدنيا مقلوبة” و أجاب بكوميدية واضحة مع إبتسامة “أنا هلعب دور المقلوبة نفسها” أما عن مشاركتة بالعرض تحدث قائلاً ” أنا من ضمن ثلاث أو أربع فنانين بيشتغلوا مع الشباب و خصوصاً فرق إسكندريه بحس إن ده واجب علينا كفنانين إننا نقف جنب البراعم و الناس التي تحبو في التمثيل عشان يستفادوا مننا نعلمهم حاجة جديدة و في نفس الوقت يذكرونا بالخير بعد كده و طبعاً سعيد بمشاركتي مع مخرج شاطر زي مصطفى حمد و إن شاء الله نقدم عمل يليق بالجمهور السكندري” .
رسالة إلي الجيل المسرحي الواعد من الفنان “فتحي سعد” ؟
عاوز أقول للشباب و خصوصاً اللي واخد الفن إبهار بس لا أنت لازم كده من الأول تشوف نفسك هل أنت موهوب و لا مش موهوب لإن في دلوقتي واحد يجي يقولك أنا نفسي أبقى مشهور زي فلان المسأله مش كده لإن التمثيل من أصعب المهن اللي في الدنيا عشان كده بقوله لازم إنك تبقى موهوب و تحاول بقدر الإمكان إن أنت تقرأ و تذاكر و تشوف مسرح كتير بحيث إنك تنمي الموهبه بتاعتك و لما تلاقي نفسك إنك مش قد الموضوع إمشي لكن ما تاخدهاش عافية عمر التمثيل و الفن ما كان بالعافية .
الجدير بالذكر أن العرض المسرحي “الدنيا مقلوبة” سيتم عرضه يوم الخميس الموافق 23/11/2023 علي خشبة مسرح عبد المنعم جابر بمدينة الإسكندرية في حضور باقة من ألمع النجوم و سيتم رفع الستار في تمام الثامنة مساءً ، و العرض المسرحي من إخراج / مصطفى حمد و مخرج منفذ / منى احمد و تأليف / أحمد عبدالله و إستعراض / ميدو ناصر و منفذ مزيكا / محمد الكحلاوى و تصوير و مونتاج / أسامة و مصمم و منفذ الديكور / عاطف ذهنى و منفذ إضاءة / أحمد الروبى و فوتوغرافر / محمد العمده و تصميم الديزاين / بيبو عبده و علاقات عامة / فوقيه ناجى و منسق إعلامي / آيه سالم .
