جروب ” مروة سويت “.. إبداع باهر في تصميم الأطعمة كتحف فنية
حوار: أحمد الدخاخني
جروب ” مروة سويت”, هو جروب عبر موقع التواصل الإجتماعي أسسته مروة الشهاوي, حيث مسقط رأسها في محافظة كفر الشيخ والتي كانت تعمل كمعلمة, وتتفنن مروة في صنع المأكولات الحلو منه والحادق كأنها تحف فنية مصنوعة بإتقان, فهناك تورتة صنُعت بتصميم كأنها إستاد مباراة كرة القدم من الخارج ممزوجة بصورتي لاعب الكرة والكأس, وتورتة أخرى تعطي صورة حديقة الحيوانات, وكعك بتصميم شكل ورق الأشجار بجانب بسكويت على شكل صنوبر, وغيرها من الأطعمة الممزوجة بالفن التشكيلي مما نالت إعجاب الكثيرين من حيث الشكل والمذاق.
وتواصلت ” عالم النجوم” في حوار خاص مع مروة الشهاوي, مؤسسة جروب مروة سويت, للتعرف على بداية فكرة تأسيس الجروب وعن الأطعمة الممزوجة بالفن التشكيلي, كما يلي:
في البداية نتعرف بحضرتك ؟
مروة فؤاد الشهاوي مواليد كفر الشيخ لكن كنت مقيمة في القاهرة لحد الزواج رجعت تاني كفر الشيخ, وخريجة جامعة الأزهر كلية أصول الدين شعبة الحديث وعلومه.
متى كانت البداية في صنع الحلويات ؟
قبل ما أتزوج كنت مدرٌسة لمرحلة إعدادي وثانوي أزهري في مدارس خاصة في القاهرة, لما انتقلت لكفر الشيخ للأسف مافيش هنا مدارس خاصة علشان أنا متعودة أشتغل, من هنا بدأت أعمل حاجات بسيطة لزوجي ولبنت عمي دول كانوا أول ناس يدوقوا ويشجعوني وبدأت فعلياً كان من 6 سنين وعملت الجروب من 5 سنين ونص تقريباً وكان في الأول صعب لأني مش معروفة هنا لأن والدي بحكم شغله اتنقلنا القاهرة من 87.
متى فكرتي في تصميم حلويات على شكل رسومات ومزج الأطعمة ببعضها ؟
كان نفسي أسافر وألف العالم فعلاً لقيت ده من خلال القراءة و الأكل سواء حلويات أو حادق وكل دولة ليها حاجة خاصة بيها فكنت بجرب وأول مرة لما جربت الشيكولاتة اللي بالشطة من هنا كان مافيش نكهة مستحيلة بس في ميزان لأنك تضيف حاجة تظهر طعم حاجة تانية, من غير ضحك أنا كنت بجرب وبحط في حاجات كنت برميها وحاجات ببقي فرحانة أني وصلت ليها.
ما مدى إقبال الناس على أعمالك؟
خلينا متفقين إن أي حد بيدخل مجتمع جديد بتاخد وقت بثبت في نفسك والحمد لله ربنا كرمني وحفرت إسمي بأيدي من غير مساعدة من حد وليا عملاء من سنين مستمرين معايا بحترمهم جداً انا عارفة حضرتك ممكن تستغرب أن مفيش “رفيو ” كتير علي الجروب بس علي الماسينجر في كتير لأن للأسف لما حد بيكتب رفيو بتلاقي تعليقات سيئة من بعض الناس زي اللي هو ” أكلتي لوحدك, طيب أعزمي ” وكان في تعليق ” كل ده أكلتيه لوحدك” فبقيت بعذر العملاء أنها مش بتعمل رفيو علي الجروب.
هل هناك جوائز أو تكريم حصلت عليها ؟
لا لسبب واحد وأنا مقتنعة بيه, في مجالات تستحق أكثر وأكثر وكل حاجة ليها ترتيبها وأولياتها في التأثير علي المجتمع ودول الأولي في التكريم, واتكرمت لما كنت مدرٌسة من المدرسة وبعديها من الطلبة بتوعي مش في المجال ده لكن تكريمي كان ثقة الناس وحبهم ليا وده أغلي حاجة وأهم حاجه وصلت ليها.
ما هي أحلامك الكبيرة التي تسعي لتحقيقها ؟
أن ربنا يكرمني ويكون لينا براند خاص بينا والحمد لله بدأت باللوجو بتاعنا بناخد الخطوة بتأني علشان تكون مدروسة صح.
