- حوار جريدة عالم النجوم كان من داخل معرض للسيدات العاملات في مجال الهاند ميد
- حوار جريدة عالم النجوم مع أحدى فنانات الهاند ميد
- ممكن تعرفينا بنفسك ؟
- بقالك قد ايه بتشتغلي في المجال ده ؟ فترة طويلة ولا من قريب ؟
- اتعلمتى المهنه دى في وقت قد ايه؟
- انتى بتجيبى القماش وانتى بتفصلية دى الملاية والخداديات بالمخدة ؟
- السيدة الثانية ردت قائلة
- ايه اكتر تصميم انتى بتحبيه ؟
- اية اكتر موديل الناس بتحبة؟
- صديقتها ردت قائلة
- فية صعوبات بتواجهك ؟ فية ازمات او اى حاجة ؟
- هل السبب أن مفيش اقبال على المصري؟
- السيدة الأخرى
- مفكرتيش تعرضى منتجاتك على محلات؟
- نفسك تطورى من نفسك اكتر؟
- يعنى مش دى بس الافكار اللى انتى واقفه عليها ؟
حوار جريدة عالم النجوم كان من داخل معرض للسيدات العاملات في مجال الهاند ميد
حوار جريدة عالم النجوم … اليوم كان حوار شيق .. حيث أنبهرنا عندما دخلنا معرض لمجموعة من السيدات الذين قرروا تحدي البطالة وصنع مستقبل وحياة أفضل وأصبحوا أيادي منتجة نافعين لأنفسهم ولوطنهم ، وأصبحوا مثل يحتذى به وشرف لأي سيدة مصرية أن تأخذ منهم القدوة والمثل الأعلى ..
معانا فنانة من صانعي الهاند ميد فى مصر وخاصة في مجال المفروشات.. وشرفت اليوم بحواري معاها
حوار جريدة عالم النجوم مع أحدى فنانات الهاند ميد
مساء الخير ..معاكى الاعلامية دعاء نصر.. رئيس مجلس ادارة جريدة عالم النجوم
ممكن تعرفينا بنفسك ؟
دعاء مجدي بشتغل شغل مفروشات هاند ميد
احنا بنجيب القماش شغل مفروشات هاند ميد
بنجيب القماش ونفصله بنفسنا خامات كلها مصري مش بنجيب حاجة من برة ، احنا فردين بس اللي بنشتغل بماكينتين عندنا في البيت .
بقالك قد ايه بتشتغلي في المجال ده ؟ فترة طويلة ولا من قريب ؟
بنشتغل لنفسنا واصحابنا من كذا سنه لكن لما فكرنا أننا نعمل في المجال التجاري كان من ٦ شهور بس
اتعلمتى المهنة دى في وقت قد ايه؟
اتعلمتها من ماما اننا نجيب الحاجة فى البيت لو فية قريبة عاوزة حاجة نساعد بعض ونعملها بدل ما نشتري
عندما طلبت من السيدة فتح أحد المفروشات .. أنبهرت بروعة المشغولات ..وقالت لي أن كله خامات مصري من شركة العامرية للغزل والنسيج.
انتى بتجيبى القماش وانتى بتفصليه ؟ دى الملاية والخداديات بالمخدة ؟
ايوة ومقاسات اكبر من بره لان صاحب المحل بيجيب توب كبير يعمل ٤ اطقم بيكون فيه فروقات معاه لكن انا مش هتفرق معايا لانى بعمل طقم واحد فبعمل المقاس على اخره.
ردت سيدة أخري قائلة ..
ده اللى بيفرق شغلنا عن الجاهز لانك مش بتلاقي فيه المقاسات دي تلاقى المقاسات اقل لانه بيطلع من القماش كام طقم
ايه اكتر تصميم انتى بتحبيه ؟
السيدة تظهر تصميم اخر رائع كما هو موضح بالفيديو..وسألتها دى تصميم اية؟
ده مفرش كرانيش
اية اكتر موديل الناس بتحبه ؟
الموديل العملي االى الناس بتفرشه وتستخدمه فى نفس الوقت وهو المفرش الكرانيش
وتصميم الملايات البسيطة
صديقتها ردت قائلة ..
احنا بنشتغل فى الجمعية ازاى نعلم السيدات انها تعمل اللحاف بايدها في البيت متضطرش تشتريه جاهز
وبنشتريه بالمتر ونشتغله وبيطلع طبعا أرخص بكتير من الجاهز .
فية صعوبات بتواجهك ؟ في أزمات أو اى حاجة ؟
شراء الحاجة سهل لكن التسويق هو اللى صعب
فيه ناس مقبلة على التركي والمستورد
هل السبب أن مفيش إقبال على المصري؟
أحنا بنجيب خامات مصري نظيفة مش مخلوطة فبيبقى سعرها بين المصري الشعبي والمستورد
يعنى انا بفرق عن سعر التركي حوالي ٢٠٠ جنيه اقل وبفرق عن المصري الشعبى ٢٠٠ جنيه اعلى
فالناس بتقول انا كده كده هجيب اغلى من المصري يبقى اجيب مستورد
ويبقى اسمى جبت طقم تركى
السيدة الأخرى ..
اغلب الناس هنا فى المعرض مشكلتهم التسويق
يعنى المشكله هنا التسويق السيدات محتاجين حد يشوفهم ويعرفهم ويسوقوا منتجاتهم
قالت أحدهما
هما سيدات منتجات عظيمات تحدوا كل الصعاب واتعلموا وبيعلموا غيرهم لكن مشكلتهم التسويق عاوزين حد يساعدهم علشان يحسوا انهم لقوا نتيجة لتعبهم ، والمجهود اللى هما بذلوه.
وردت أخري .
احنا مش بنعمل كميات كبيرة فمضطرين نبيع بسعر معين لكن لو بنعمل كميات اكبر من كده وبشترى جملة اكبر من كده اكيد هبيع اقل لانها هتتكلف اقل
مفكرتيش تعرضى منتجاتك على محلات؟
المحلات عاوزة تاخد بدون فلوس وعاوزة تقسط وساعتها مش هضمن فلوسي وفيه محلات بتصنع لنفسها .
المشكلة ان فيه حاجات كتير شعبى ورخيصة فى السعر بس اول ما بتتغسل بتبوظ خلاص
نفسك تطورى من نفسك اكتر؟
اكيد نفسنا وبنحاول وبنسعي لده
يعنى مش دى بس الافكار اللى انتى واقفة عليها ؟
احنا بنحاول اننا نشوف موديلات من المواقع من النت نعمل شبها كده يعنى بس طبعا الامكانيات
خايفة اعمل حاجة اعلي معرفش ابيعها والحاجه تفضل عندى
عندما سألتها أعتقد أن المعرض هنا فرصة كبيرة للناس تتعرف عليكم
ردت المعرض فرصة ان الناس تعرف ان المنتجات المصري احسن واقيم من المنتجات المستوردة
