خالد عليش: “النهاردة انا خدت حكم تاريخي وأقدر أقول حسبي الله ونعم الوكيل”
كتبت: ثريا الصاوي
حصل الإعلامي خالد عليش على حكم يخص ابنته بعدما أصدرت محكمة الأسرة بمدينة 6 أكتوبر، اليوم، حكمًا لصالحه بإلزام مطلقته بتمكينه من رؤية ابنته لمدة 11 ساعة أسبوعيًا يوم الجمعة.
وقال خالد عليش عبر حسابه الرسمي بموقع فيس بوك: “النهاردة أنا خدت حكم تاريخي يارب يتنفذ على خير وتاريخي لأنه أحسن حكم ممكن اخده واللي طلع الحكم قاضي مش واحد صاحبنا ف ده معناه إن الراجل أقره وفهم و بيدي لكل واحد حقه لكن جه الوقت اللي أقول فيه اللي جوايا حسبي الله و نعم الوكيل”.
وتابع: “أنا خصيم لكل واحد أو واحدة حتى يوم الحساب ساعدو بشكل مباشر أو غير مباشر إني ما اشوفش بنتي بطريقة إنسانية كل حد كبير أو صغير جريت وراه بالمكالمات عشان أشوف أي حلول ودية حتى الحركات و الجروبات النسوية اللي بيدافعو عن الست و خلاص أي حد بيكتب تعليق وهو مش فاهم حاجة فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم وأنا ملتزم بكافة الالتزامات المادية ناحيتها من اول يوم كاملة وزيادة كمان عن المستوى المادي والاجتماعي اللي عايشين فيه ومع ذلك استحملت كتير و ماردتش”.
وأضاف خالد عليش: “أنا لا حول لي ولا قوة حاولت مع كل الحلول الرسمية والغير الرسمية تعبت من اللف في دوائر مغلقة تعبت من نظرة والدي و والدتي المريضة اللي نفسهم يشوفو حفيدتهم ومش قادر أعملهم حاجة ده أنا أوحش رجل في العالم و لكن ما استحقش إني ما يكونش عندي فرصة اتكلم و أخرج معاها و أفسحها عشان علاقتي بيها تبقي كويسة محدش يقولي أنت السبب عشان سيبت ماماتها أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية و كل شئ نصيب و الانفصال كان برغبتها قبل رغبتي”.
وأكمل حديثه: “محدش يقولي ما انتا كنت زوج وحش و .. و انا يمكن مكنتش احسن زوج برغم اني عملت اللي عليا كتير و اجتهدت كتير عشان اسعد الطرف التاني ولكن ده مش معناه اني انسان وحش و مستحقش فرصة تانية ومستحقش اشوف بنتي محدش يقولي ما انتا مبسوط و اتجوزت تاني انا فعلا الحمدلله زي الفل و مبسوط اني اخدت فرصة تانية ربنا يكرمني فيها واكون انسان افضل و استمتعت بحق ربنا سبحانه وتعالى و المجتمع ادهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه و مطلوب مني انساه محدش يقولي ما انت كنت بتشوفها”.
وواصل عليش: “انا فعلا مع بداية الانفصال كنت بشوفها ساعات قليلة في الأسبوع بس مع أي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين وسط شروط كتير منها متتصورش معاها وتنزل ليها صور متوديهاش عند اهلك تيجي عيد الميلاد لوحدك بدون باباك او مامتك حسيت في الوقت ده إني لازم استخدم التعاقد اللي بيني وبينها اللي بيقول اني اخد البنت يوم في الاسبوع و لكن القانون اداني حق الرؤية الطبيعي الغير انساني للطفل، فضلت ٥ شهور في مساومات اني معملش تنفيذ حكم الرؤية حفاظا على البنت و لكن ماماتها صممت وبعد التنفيذ كان مهانة و مذلة للطفلة و ليا بعدها مبقتش اروح و بعت إنذار رسمي ليها بكده و مازلت في الاجراءات القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي ومناسب”.
وذكر: “محدش يقولي ما انتا ما بتصرفش عليها و مبهدل مامتها في المحاكم برغم ان مش ده الموضوع بس الحمد لله الفلوس اللي الام طلبتها كنفقة و مصاريف بتوصل كل اول شهر بدون اي محاكم من اول يوم حصل بينا انفصال رسمي بدون محكمة بعقد اتفاق بينا و لو حصل دخول محاكم في اول الخلاف ف الام اللي بدأته وده بالتواريخ مش بالكلام موضوع ان في مصاريف زيادة بتطلب بشكل مبالغ فيه دي قصة تانية فيها نقاش وحوارات كتير ومع ذلك قولت انا عندي استعداد لأي زيادة غير منطقية بس نقعد و نتناقش محدش يقولي روح شوفها عند جدتها عشان انا مش هعرف يبقى في علاقة طيبة بيني وبين بنتي وانا قاعد معاها ساعة عند جدتها و هما قاعدين جنبي و قعدتي تبقى كلها مذلة ومهانة”.
واستكمل: “محدش يقولي انتا بتتظاهر انك عايز تشوف بنتك لكن انت مش فارق معاك الابهات هنا اللي هيحسو قد ايه دي حاجة مؤلمة و انا مش محتاج اعمل ده و طول الوقت طلبت من اي حد قريب منهم ان احنا ننزل و نقعد و نوصل لحل وسط انا مش طالب فيه غير اني اخد بنتي يوم في الاسبوع اخرجها و ارجعها انا نفسي احس بحضن بنتي بقالي اكتر من سنة و مقعدش اتكلم في مشاكل حصلت من سنين انا اوحش رجل في العالم بس حقي اخد فرصة عشان تكون في علاقة كويسة بيني وبين بنتي حسبي الله ونعم الوكيل”.
واختتم خالد عليش حديثه قائلًا: “شكرا للاستاذ شعبان سعيد المحامي و ربنا يكملها بخير شكرا ميرهان زوجتي انك مستحمله كل ده وفي ضهري ومؤمنة بيا”.
