دكتورة سناء شريف مساعد وزيرة التعاون تكتب: مشكلة الشعب والأسعار

عارفين مشكلة السيسي ايه ؟!!! …انه عمره ما حسس المصريين اننا فى حالة حرب !! ولا استخدم حروبه ومعاركه فزاعة لتخويف الناس !!! فبعض الناس نسيت اساسا اننا بنحارب حروب غير تقليدية ولابد لها من اثار على حياتنا واسلوب معيشتنا 

فى حرب  الارهاب ….قالكم اطمنوا احنا اللى نموت وناخد الضربة فى صدرنا بدالكم 

وقد كان …وفى عز الفرحة والاعياد والمصريين بيمارسوا حياتهم عادى جدا خروج وفسح واحتفالات….كانوا الشهداء يتساقطون ودمهم يسيل تمن امننا وراحة بالنا 

فى عز حرب الوباء …ما جاش عمل زى رئيس وزراء بريطانيا مثلا ولا خوف الناس ولا قالكم ودعوا احبابكم ….على العكس قال اطمنوا وحتعدى باءذن الله وكان مع كل موجة جديدة للكورونا يدعى الدعاء المحبب له ..((اللهم انت ربى لا اله الا انت عليك توكلت )) ….وعدينا فعلا بفضل الله وبفضل جهد وتعب وتخطيط وانفاق كبير فى ميزانية الصحة لمواجهة الوباء باقل خسائر ومعدلات وفاة 

فى عز حرب الترويع والتفزيع من ازمة سد النهضة … و قوى الشر اللى كانت بتبث فى نفوسكم الخوف من الجوع والعطش ….طلع وقال لكم اطمنوووا ولا يليق بنا ان نقلق ابدا

في عز حرب روسيا واوكرانيا …واضطراب سلاسل الامداد لسلع استراتيجية اهمها القمح ..وهلع العالم كله من اختفاء سلع اساسية واستراتيجية او نفاذ طاقة او وقود ….طلع هو وقال لكم اطمنوا وانزلوا واشتروا كل اللى انتم عايزينه وعندنا مخزون استراتيجى يكفى ويفيض …وقد صدق  

في عز الازمة العالمية الاقتصادية الاخيرة والناتجة من تبعات الوباء وحرب روسيا واوكرانيا ….والتضخم العالمى والركود والتباطؤ وتراجع نمو الاسواق الناشئة وارتفاع سعر الدولار قصاد عملات دول كتير ومش بس مصر ….طلع هو امبارح يقول اطمنوااااا اطمنواااا  

كل دي حروب وتحديات قال لكم فيها اطمنووووا ….وقد صدق فى وعده 

كل دي حروب عدت على المصريين ولسه مكملين في مواجهتها باءذن الله …..لم يتعامل معها المصريين على انها حروب كبيرة …ولها اثار فعلا مدمرة على اى شعوب …وده بفضل ربنا اولا ….وبفضل تطمين الريس لكم وتجنيبكم الخوف والهلع التطمين ما كانش مجرد دروشة ولا تواكل لا ده كان معلومة و تخطيط واستعداد وسبقهم التوكل على الله كان الاسهل لاى رئيس مكانه ….يعيشكم اجواء الحرب الحقيقية بسوادها …لكن ده ما حصلش والحروب مش لعبة فى الحروب قد يكون رغيف العيش الحاف ذاته منتهى الرفاهية عارف انك ممكن تكون تعبان او زعلان او متضايق أو كلهم مع بعض حقك وطبيعي حقك لأنك معذور بسبب الظروف الملخبطة اللي العالم فيها دي لو فضفضت بكلمتين عادي بنتحمل بعض مفيش مشكلة ما احنا لازم نتحمل بعض ونخفف عن بعض ومفيش مانع نفهم بعض علشان نستوعب ضيق بعض

لكن تعبك من الظروف مش مبرر إنك تغلط في القيادة أو تشتم في البلد 

اقسم لكم بإيه إن لولا اللي الراجل ده عمله من ساعة ما جه كان زمانكم بتبيعوا عيالكم علشان تاكلوا في الظروف دي تخيل لو الحرب الروسية الأوكرانية دي حصلت ومصر بنفس الوضع المتردي السابق

تخيل موجة الغلاء مع نقص السلع مع عدم وجود بنية تحتية مع هروب مستثمرين مع غلق مصانع مع فساد

تخيل مفيش محطات الطاقة العملاقة اللي اتعملت دي

تخيل مفيش اكتشافات غاز ولا تصدير تخيل مفيش توسع للأراضي الزراعية ولا زراعة للصحراء بالشكل ده

تخيل مفيش كام ألف مصنع اتفتح يغطي احتياجات السوق والمواطنين

تخيل 110 مليون بظروف ووضع لا يصلح لمعيشة 20 مليون  أيوة فيه أزمة و اول مرة تحصل في مصر في العصر الحديث ثورات وراها فيروسات وموت وراها حرب وخراب

لكن حصل قبل كده الاكتر منها .. حصل فقر ومجاعة وامراض خطيرة والناس وقتها كانت معتقدة إنها النهاية .. والمجاعات و الاوبئة قضت على الآلاف من الشعب

بس ماسمعناش في التاريخ كله و لا الوقت اللي حصل فيه كده إن الناس كرهت البلد أو شتمت الحكام زي ما بنسمع ونشوف الوقت

كم تعليقات الندب من الوطنيين على صفحات الكارهين للبلد تكسف والله انا مستغرب من كمية المتفاعلين مع صفحاتهم ومشتركين مع الخرفان دول في التوجهات المنحطة ضد الدولة 

متناسين أو عاملين نفسهم متناسين إن الوضع المذري ده وضع عالمي مش مصري .. وان العالم كله بيئن والشعوب كلها حالها يصعب على الكافر مش المصريين ولا حاجة

خلوا في أمانة في الطرح و اعتدال في التقييم علشان كل ده فترة وهتعدي و ادي اللي شافته مصر زمان اهو انتهى و عدى ومصر باقية .. وياما أزمات هتيجي وهتعدي ومصر هتفضل وهتبقى فالافضل انك تقف في ظهر بلدك وتسندها بدل ما تطعن فيها وتتخلى عنها علشان ظروف ملناش يد فيها ولما البلد تاخد اي إجراء شايفاه مناسب للوضع الحالي .. ماتفضلش تنظر عليها وتعملنا فيها خبير اقتصادي دارس في مؤسسة اقتصادية دولية والقيادة ناس جاهلة جنبك

شهادة نزلت مدتها سنة واحدة لا اكثر و لا أقل ايه خطورتها دي ولا ايه تأثيرها على الاقتصاد رجال أعمال مين اللي هيوقفوا مشاريعهم ويعملوا شهادات 

انتوا طيبين ولا حاجة ؟!

هو انت فاكر إن رجل الأعمال مستني مكسب 25% على فلوسه المستثمرين يا بابا لو مكسبش يغنيه عن البنك وودايعه أو يبقى ما ينفعش يبقى مستثمر 

استثمارات ايه ومشاريع ايه اللي هتتوقف وبطالة ايه اللي هتزيد و بورصة ايه اللي هتقع يا اخي انت كدة قتلت المنطق والله واحد بيشتغل في السوق بعشرات المصانع ومشغل كام مليار في السوق هيضحي علشان شهادة مدتها سنة لأ و ايه هامش ربحها 25% 

لو كل رجال الاقتصاد زيك كده كان زمان أقصى مشروع فكروا فيه كان هيبقى بيض الفراخ وبطاريات الارانب وشعار نحن نحمل الخير لمصر 

الله يهديكم وتتعالجوا من الهبد بقى أنا مع بلدي لاخر نفس لو فضلي في البلد دي الرغيف أبو شلن ده وده اخر كلام عندي