سارة مصطفى .. فنانة تشكيلية تحلم بعمل ورشة مجانية للرسم

حوار : أحمد الدخاخني

سارة مصطفى السيد, طالبة الفرقة الثالثة في كلية التربية النوعية بجامعة دمنهور, والتي تبلغ من العمر 20 عاماً, بأقلامها تبدع الفتاة الموهوبة سارة في رسم صور تعبيرية وكرتونية رائعة على اللوحات الفنية وعلى السكيتشات, وشاركت في العديد من المعارض الفنية لعرض رسوماتها مثل معرض Whit rose 3 ومعرض رؤى عربية والدورة الثالثة من معرض بنت الورد. 

في حوار خاص تواصلت ” عالم النجوم ” مع سارة مصطفى للحديث عن مشوار اكتشاف موهبتها وعن أحلامها , كما يلي : 

في البداية عرفينا بنفسك ؟

أنا اسمي سارة مصطفى السيد, عندي 20 سنة, طالبة الفرقة التالتة في كلية التربية النوعية بجامعة دمنهور. 

متى اكتشفتي موهبتك في الرسم ؟

اكتشفت موهبتي لما كنت لسة صغيرة من قبل ما أدخل المدرسة وكان عندي ميول لحب الألوان وكان سهل اني أرسم وأشوف كل حاجة قدامي, والفضل يرجع لأمي كانت دايماً بتدعمني وبتجيبلي سكيتشات وألوان وكانت شايفة أي حاجة برسمها حلوة حتى لو المستوى قليل, وبدأت أرسم لغاية ما دخلت ثانوي وبعدين وقفت رسم وكنت عايزة أركز في مستقبلي لأني كنت برسم كتير جداً, وكنت عايزة أدخل كلية فنون جميلة لكن للأسف مجموعي ماجبش الكلية دي, وبدأت أدور على كلية بديلة تكون نفس مجالي, فدخلت كلية التربية النوعية وفيها بيتم تدريس مش بس رسم إنما تصوير ونحت وتصميم وأشغال خشب ومعادن, فهتكون دي حصيلة للفن ورضيت جداً أني دخلت تربية نوعية. 

 ما هي الأدوات التي تستخدميها في الرسم ؟

أول حاجة كان بالقلم الرصاص أو أي قلم جاف وبعدين تطور شوية بستخدم ألوان فلوماستر وألوان خشب كانت جاتلي من بره مصر وكنت مبسوطة بيها جداً وأي حاجة كانت بتجيلي بالنسبة لي ثروة بحتفظ بيها وكانت قيٌمة وعظمة لازم تتقدر بشكل كبير.

 هل هناك صعوبات تواجهيها أثناء الرسم ؟

مفيش حد محترف دايماً وبتجيلي أوقات فيها صعوبات بس بقدر أجتاز النقطة دي في إني أسأل حد أفضل مني وهو بيساعدني فبحسن من نفسي, والرسم اداني صبر ولازم تيجي بالمحاولة مش من أول مرة, وفكرة إن تقابلني صعوبة في الرسم دي حاجة كويسة, بيخليني لو حد معرفة أكبر مني وأسأله عنها هطلعها أحسن من اني أفتكر الدنيا سهلة, وبالممارسة أعرف ايه النقطة اللي محتاجة أحسن فيها, والصعوبات اللي بتواجهني هي الأوت لاين والتظليل فممكن أستخدم خامة معينة مااستخدمتهاش قبل كده فبيكون الإستخدام غلط فبتعلم تكنيك مختلف.

هل هناك جوائز حصلتي عليها في الرسم ؟

في المدرسة كنت باخد جوائز رمزية زي أستيكة وقلم وسكيتش ولسة محتفظة بيهم, ومؤخراً اشتركت في معرض Whit rose 3 وحديثاً اشتركت في معرض بنت الورد 3 والتكريم هيكون يوم 2 أكتوبر, وإن شاء الله هشارك في معرض رؤى عربية, والبيت الروسي في الإسكندرية. 

ما هي أحلامك الكبيرة التي تسعي لتحقيقها ؟

 حابة إن يكون إسمي معروف, المعرض اللي أروح فيه يبقى معروف سارة مصطغى من غير ما أعرٌف نفسي إن سارة رسمها كذا, فالموضوع بالنسبة لي لما بروح أي معرض بحس إن أنا لوحدي أو عشان معرفش حد فبيكون في صعوبة في التعامل مع الشخص اللي قدامي هل هو هيقبلني, فنفسي أني أكون معروفة والخطوة اللي بعدها أطلع في التليفزيون, وانتقل لمستوى أعلى وعندي إتقان لكل خامة بشتغل عليها وأعرف كل كبيرة وصغيرة فيها, واتعلم تصميم الملابس وخاصة القديمة منها, وكمان أفتح ورشة رسم مجانية وأعلٌم أي حد الرسم مش بس للهواية وإنما أيضاً ملجأ أنه يطلٌع الطاقة السلبية ويلاقي ركن هاديء يحتويه.