قناة للأطفال ياولاد الحلال
فاطمة المعدول
بقلم / فاطمة المعدول
مخرجة مسرح أطفال و كاتبة أدب الأطفال
حقيقي أنا مذهولة ومتعجبة من الموقف الرسمي من الاطفال المصريين ؟ مستخسرين فيهم قناة مع أنها أصبحت ضرورة مش ترفيه ولا تسلية فقط ،، الناس دي مش فاهمة ان ولادنا إللي عايشين مع ديزني دول بيتعرضوا لخطر حقيقي ، غير بقي الهيمنة الامريكية والقط والفار والتصنيفات الخايبة بتاعة زمان !! المديرة التنفيذية قررت ان ديزني تبقى أهم منصة من أجل المثليين وانها تعيد بعض الأعمال علشان تحط فيهم مثليين وممكن يبقوا الأبطال إللي ولادنا بيحبوهم ومرتبطين بيهم !! وطبعا أحنا مانقدرش نتدخل في خصوصياتهم وفنونهم هما أحرار في بلادهم ومعتقاداتهم !!! لكن إللي يهمنا ولادنا هايفكروا إزاي ويحسوا بإية لما مجتمعهم كله بينظر لفعل بعدم ارتياح وهي كلمة مهذبة لانه فعلا يبتدي بتحريمة وينتهي بتجريمة ؟؟ وهما في نفس الوقت بيحبوا أبطالهم المختلفين والمختلف عليها في منازلهم ومجتمعاتهم ؟؟ اي خلل وانكسار في النفس سوف يلحق بأطفالنا ؟؟ الا يستحق أطفالنا قناة تفكر وتخاطبهم بالمصري ، قناة تعمل من أجلهم وتسليهم وتمتعهم وتبث فيهم الانتماء والروح الوطنية والإنسانية؟؟ وتقف أمام الطوفان القادم المرعب !! أنا مش فاهمة الحكومة إللي عمالة تقول بتبني بلد ، طيب وهو فيه بناء من غير أساسات أو من غير رؤية، وهو في أهم من إننا نعمل من أجل المستقبل، طيب وهو في مستقبل أهم من مستقبل اولادنا ،، الكباري والأنفاق ممكن يجي زلزال أو قنبلة أو اي حاجة وتشيلها من على وش الأرض لكن لو فيه بشر منتمية وواعية وفاهمة هايشيلوا الانقاض وهايبنوا أحسن من إللي اتهد، والأطفال هما أهم كوبري سنعبر بيه للمستقبل .
ولادنا بيتفرجوا عند الجيران وبينسوا لهجتهم الأصلية وخصوصيتهم الاجتماعية والحياتية أو عند الاغراب إللي خرجوا تماما عن خصوصيتنا ، طيب أحنا نعمل إيه والأهالي يعملوا إيه ؟
أحفادي الاتنين في مدارس فرنساوي وأهاليهم بيكلموهم بالعربي ، لكن كل كلامهم مع بعض بالإنجليزي ،، لان الميديا بالإنجليزي وبنحاول معاهم يتكلموا عربي ،، لكن أكتر حاجة بتسعدهم بالانجليزي ،، يعني الميديا أصبحت مؤثرة أكتر من البيت والمدرسة.
ألا يوجد رشيد في هذا البلد ينقذ أطفالنا من القادم المرعب ؟؟
هل وجود قناة أطفال صعب إلى هذه الدرجة ومستخسرين الفلوس لهذه الدرجة ؟؟ وحكاية إنهم يعملوا شوية برامج أو كرتون خلاص ماعدتش تنفع في الزحمة إللي عايشين فيها ؟ بلد فيها أكثر من ٢٠ قناة وأغلبهم مالوش اي لازمة مستخسرين في ولادنا قناة ونسيبهم يتفرجوا عند إللي يسوي وإللي مايسواش ،، استغفر الله العظيم.
