كريم سامي مغاوري وحوار خاص من القلب مع عالم النجوم
إعداد/ نهى مرسي حوار / سعيد المسلماني
كريم سامي مغاوري، ممثل مصري، حاصل على بكالوريوس المعهد العالي للفنون المسرحية بالتمثيل والإخراج عام 2007. وهو نجل الفنان القدير سامي مغاوري، شاب خفيف الظل، طموح، ناجح، مقبل علي الحياة، يتمتع بشعبية كبيرة، يدخل القلب دون أستأذن، دخل مجال التمثيل عن طريق الصدفة، من خلال مسرحية “تكسب يا خيشة”، عام 1994.
وفي حوار خاص مع الفنان كريم سامي مغاوري كان هذا اللقاء مع عالم النجوم :
الجزء الثاني :
الفنان كريم سامي مغاوري قدمت العديد من الأعمال الفنية هل هناك دور تتمنى القيام به ؟
انا لحد النهارده 90٪ الادوار إللي بتتعرض عليه بقبلها، أنا حابب أبقى متنوع في كل الأدوار خصوصا بعد مرور مرحلة فقدان وزن كبير جدا دي فتحت لي الباب شخصيات أكتر ماكنتش أقدر اعملها وأنا تخين خلتني في منطقة مختلفة تمامًا كنت محصور في الكوميدي بس أنا شايف ان أنا ممثل أقدر أقوم بكل الادوار لو هي مناسبة ليا سواء كوميدي أو تراجيدي شخصية الشرير يعني بقيت متنوع أكتر بقى متاح ليا ان اقدم شخصيات متنوعة واكيد في أدوار أو أنماط معينة من الشخصيات نفسي اقدمها بس اقدمها بشكل مختلف يعني شخصية الشرير الكوميدي دي حاجة كتير نصحوني لان مش موجودة كتير في الساحة وأنا عموما لما بحب أقدم دور بحب أذاكر جدا علشان اطلعه بشكل مختلف عن أي دور انا عملته قبل كده.
إصابة الفنان كريم سامي مغاوري بكورونا .. كلمنا عن أحساسك بإنك مصاب بكورونا وكيف مرت عليك هذه الفترة الأليمة ؟
الإصابة بكورونا كانت حاجة من أصعب ما يمكن.. أنا اوردي مقيم لوحدي من فترة كبيرة فكان الواحد في عزل إجباري، كانت حاجة سيئة جدا إن الواحد يبقى لوحده و تعبان ومريض بشكل كبير.. وأنا الفيروس جالي بشكل قوي جدا كانت حاجة صعبة، 19 يوم مروا عليا من أصعب ما يمكن.. أنا متعود إن أنا أقعد لوحدي .. بس إن الواحد لا عارف يخرج ولا عارف يفتح الباب ولا عارف يعمل أي نشاط بشكل كويس، لإنه منهك صحيًا ومحدش يقدر يزوره محدش يشوفه .. يعني كان موضوع صعب جدا ، وحتى مش عارف تشوف لا والدك ولا والدتك.
أنا كانوا اللي بيزوروني اتنين فقط صديقي”أحمد عمارة” وخالتي أخت والدتي.. وكان عشان يدخلوا البيت كان في يعني طوارئ بتحصل عشان ميصابوش ، لإن كان لازم حد برده يبص عليا وكده.. كان الموضوع صعب جدا أحنا في فترة من أصعب فترات التاريخ يعني والإنسانية.. الموضوع مش سهل زي ما ناس كتير متخيلة وزي ما ناس كتير بتستهتر بحياتها، اينعم احنا قعدنا في البيت كتير وفي ظروف مرت على الواحد بشكل وحش بس ظروف المرض من أصعب أصعب ما يمكن.
