- عوالم خفية أهم محطة في حياتي
- أءتغلت مع أهم فنان بالوطن العربي
محمود حمدان مسلسل عوالم خفية بالنسبالي هو أهم محطة في حياتي .. اشتغلت مع اهم حد في الوطن العربي
إعداد /دعاء نصر & حوار /دعاء سنبل
محمود حمدان تخرج من المعهد العالى للفنون المسرحية قسم التمثيل والإخراج ، وحصل على جائزة أفضل ممثل في مهرجان أفلام المبدعين العرب عام 2009 .
وحصل علي جائزه لجنه التحكيم الخاصة بأكاديمية الفنون عام 2011.
وحصل على جائزة أفضل ممثل في مهرجان الرواد السينمائي 2012
وحصل على المركز الأول في الكوميديا في برنامج نجوم الزمن الجاي عام 2007
له العديد من الأعمال الدرامية أبرزها :
سبع أرواح ،دنيا جديدة،كيد الحموات،الخطيئة،زى الورد ،خرم إبرة ،حرمت يا بابا 2،جنة ونار، أنا، سكة اللي يروح ،مطروح … عندما تلمس الخيال، الهاربة1،قصة الأمس وعوالم خفية
من أبرز كتاباته.. عوالم خفية، الديزل، اختراق 2 ، شريط ستة
مشهد للفنان من مسلسل خرم إبرة
رغم صغر سنك إلا أنك فنان شامل .. وحاصل على العديد من الجوائز والتكريمات .. قولنا نبذة مختصرة عن محمود حمدان .. وتفضل مين فيهم محمود حمدان الكاتب ولا الممثل؟
انا خريج المعهد العالي للفنون المسرحية قسم تمثيل وإخراج وبعد ما تخرجت من المعهد كنت بكتب اكثر من عمل فيهم حاجات مطلعتش للنور لحد ماجت الفرصة ان اكتب اول عمل، بفضل الكاتب ولا الممثل يعني الاتنين بالنسبالي واحد لان كنت بكتب مسرح لما كنت طالب في المعهد فكنت بكتب مسرح والمشاريع اللي كنت بعملها انا واصحابي كنت أنا المؤلف بتاعها اغلبها يعني المسرحيات اللي كنت بخرجها في المعهد كنت أنا المؤلف بتاعها،
تفتكر أول حاجة كتبتها كانت أيه وكان عندك كام سنة؟
اول حاجة كتبتها كتبت مسرح، وانا طفل صغير كنت بكتب شعر وانا في ابتدائي كنت بكتب شعر.
مين أكتر كاتب أتأثر به محمود حمدان وكنت بتقراله كتير وساب بصمة في قلبك؟
اكتر كاتب أتأثرت بيه، طبعا استاذ اسامة انور عكاشة وبعديه محمد صفاء عامر استاذ، محمد جلال عبد القوي، عندنا كتاب عظماء كنت بتعلم منهم يعني وفي الأدب الروائي كنت بقرأ كتير احمد خالد توفيق ناس كتير جدا.
برومو عوالم خفية
مسلسل عوالم خفية بيمثل أيه للفنان والمؤلف محمود حمدان واحكيلنا كان شعورك ايه لما كتبت عمل للزعيم ووقفت كمان قدامه؟
مسلسل عوالم خفية بالنسبالي هو أهم محطة في حياتي لأنه كان مع الزعيم عادل امام وده استاذ كبير جدا، جدا كل دقيقة معاه الواحد بيتعلم منه حاجات فالشغل معاه شئ مهم وده شرف ليا ان كتبت للأستاذ عادل إمام يعني، انا يمكن اكون محظوظ كتير جدا عن جيلي والجيل اللي قبلي كمان ان انا اكتب للأستاذ عادل إمام وان انا ف سن صغير يعني فالحمد لله.
إيه رأيك في مسلسلات رمضان 2020 ؟وإيه أكتر عمل شدك و تابعته بشغف ؟
اكثر عمل شدني، لا أكثر من عمل السنة دي كان في سيزون حلو اوي في أربع مسلسلات عجبوني جدا من غير ما اقول اسامي يعني.
مشهد للفنان محمود حمدان في الخطيئة
مين الفنان اللي اشتغلت معاه وتحب تكرر التجربة تانى ومين اللي نفسك تشتغل معاه ولسه ما حلفتش الحظ؟
اكيد استاذ عادل امام نفسي اجرب التجربة تاني، تجربة مهمة جدا وبرده فيلم الديزل لما فعلته مع محمد رمضان اكيد عايز اكرر تجربة محمد رمضان تانى فربنا يسهل يعني وحابب ان انا انوع مع أكثر من فنان مش لازم فنان بعينه، حابب انوع واشتغل مع فنانين تانين خاصتا ان انا مع استاذ عادل امام خلاص خلصت سقف الممثلين اشتغلت مع اهم حد في الوطن العربي فبالتالي طموحي ان اشتغل مع ممثل شاطر اكتر منه نجومية لان انا اشتغلت مع اهم نجم في الوطن العربي وعايز اشتغل مع ممثل شاطر بعد كده يعني.
حصلت على العديد من الجوائز والتكريمات ؟ أيه أكتر جائزة أسعدتك؟
الجوائز اللي انا اخدتها انا كنت اخدت، كل جائزة بالنسبالي بتمثلي حاجة مهمة جدا مفيش جائزة معينة اكتر من التانية ولكن جايزتي كافضل ممثل في المعهد العالي للفنون المسرحية دي كانت جائزة بالنسبالي مهمة جدا لان معهد الفنون المسرحية دا بيتي فلما اخد جايزة من بيتي ف ده شئ مهم يعني، خدت جوايز كتير كمؤلف وأهمها جائزة في لبنان وسعيد جدا بيها وان شاء الله متكونش اخر الجوائز.
أيه الجديد والحصري للفنان محمود حمدان اللي هتقدمه خلال الفترة القادمة ؟
الجديد الذي هقدمه الفترة الجاية .. يعني ان شاء الله مسلسل من تأليفي مش حابب اقول ايه هو لحد ما ربنا يكرم ويتاخد خطواته، وعندي فيلم، ان شاء الله يبقوا حاجات مهمه ان شاء الله.
إيه اللي بتتمناه يتحقق قبل أنتهاء 2020 ؟ تحب تقول لمحبينك أيه بمناسبة عيد الأضحى المبارك ؟
اللي بتمناه يتحقق قبل انتهاء 2020 ، أن الكورونا تنتهي علشان الخطر. لانها ماثره علينا كلنا بصراحة فتنتهي كده وربنا يخلصنا من الوباء ده علي خير يارب،.
احب اقول لمحبيني كل سنة وهما طيبين وعيد اضحي مبارك ويارب تكون سنة سعيدة عليكم وتنتهي الغمة اللي احنا فيها يارب.
