محمود متولي لمتابعيه..”زى ما الوصول صعب جدا الاستمرار أصعب بكتير”

كتبت: مادونا عادل عدلي

قام الفنان “محمود متولي” بالنشر عبر حسابه الشخصي على موقع التواصل الاجتماعي فيسبوك وقال

انا فكرت كتير اووووى قبل ما اكتب البوست ده
وفكرت اكتر في تقبل كل واحد منكو للبوست

بس فى الاخر قررت اكتبه واشارككم يمكن يكون عندكوا انتوا الحل اللى انا مبقتش شايفه

انا ربنا كرمني بعد سعى كتير قوي من اول ما عرفت يعني ايه تمثيل من وانا عندى ٦ سنين وعملت حاجات مهمة الحمد لله

ومن اول ٢٠١٦ اشتغلت مسلسلات كتير اهمهم ( الاب الروحى – ظل الرئيس- مليكه – وحاجات تانية

وفهمت ان زى ما الوصول صعب جدا ان الاستمرار أصعب كتير

وانا وقعت فجأة من الاستمرارية وفضلت سنتين مش شغال فى الميديا ومش عارف ايه السبب

على مدار السنتين دول انا ميأستش واشتغلت على نفسى كتير جدا ومبطلتش ورش ولا يوم بطلت اتعلم عشان اكون جاهز للرجوع اللى انا واثق انه هيكون اقوى

وخلال السنتين تقريبا كلمت كل مخرجين ومنتجين فنيين ومساعدين اخراج ومخرجين منفذين مصر كلها ودى حاجه انا مبحبش اعملها وتقيلة على قلبى عشان محدش يفكر ولو للحظه انى بعرفه لمجرد المصلحه لكن فى النهاية بقول ان دا رصيد سعى عشان محسش انى للحظه قصرت

وربنا مكرمش باى حاجة لا فى رمضان ولا بره رمضان لمده سنتين

الغريب ان كل لما اكلم حد ويرد عليا يقولى يا بني انت نجم ومش عارف ازاى قاعد ومش شغال

واللى يرد مشكورا يقولى يا حبيبي ده انت ممثل شاطر وان شاء الله نشتغل سوا قريب وميحصلش

مفيش ايميل مبعتوش ومفيش اوديشن اتطلبت فيه ومرحتوش

انا الحقيقة مبقتش عارف ايه الطريقة اللى تخليني ارجع تاني اشتغل

انا عمرى ما استعجلت اني انط سلالم عشان اوصل بسرعة
بالعكس انا كنت عايز اطلعها سلمة سلمة عشان احس بقيمة الفرصة والتعب والسعى

بس اللى حاصل معايا خلانى مستغرب ومش عارف السبب فين

لو الناس شايفة انى انسان مش مؤهل لوجودى فى الوسط الفني كله انا هبعد

بس اللى جوايا انى عارف ومتاكد انى اتولدت عشان اكون ممثل وعمرى ما قولت عايز ابقي حاجة تانية

انا كتبت الكلام ده عشان متاكد ان فىً ناس هنا مؤمنه بيا زى ما انا مؤمن بنفسى واكتر وعارف انهم ديما بيدعمونى

واختتم حديثه قائلا….عشان كده عاوز اقولكوا
دعمكم ده سبب انى لسه بحارب و هفضل احارب طول ما الدعم ده موجود