مريم سعيد صالح: أنا بدرس فرنساوي علشان ثباتي المادي
كشفت الفنانة مريم سعيد صالح، عن مصدر دخلها بعيدًا عن الفن، بجانب تعليقها على ظاهرة اتجاه الفنانين للسوشيال ميديا.
وقالت مريم سعيد صالح، في لقائها مع الإعلامية إنجي هشام، في برنامج “المنسي”، المذاع عبر شاشة قناة “هي”: أنا عن نفسي بدرس فرنساوي في البيت عندي علشان أحقق لنفسي ثبات في الحياة ومكنش مجبرة إجبار قهر إني أعمل حاجة لا تتفق مع أخلاقياتي.
وتابعت: في المقابل في ناس معاهم فلوس يسوقوا وينتجوا لنفسهم، في ناس بتمثل بفلوسها، وبيشتروا مشاهدات كمان، وده قهر للفنان وبيفقد الثقة في المجتمع، وبيحس أنه مهما عمل مفيش حاجة فيها فائدة، وممكن في ثانية يجي حد ابن أول امبارح يعلي عليا.
وأضافت: أنا عمري ما هاجمت دكتور أشرف زكي، واللي قولته كان مقصود به جهات الإنتاج أن في ناس شغالة من غير تصريح وبيشغلوهم ويدوهم فرص، هو أنا أقدر أشغل دكتور من غير ما يكون معاه شهادة؟ لازم المعايير تحترم علشان أحافظ على حقوق النقابيين، لما بنفتح الباب على مصرعيه لناس تانية بيحصل كساد وبطالة وأهل المهنة الأساسيين بيحصل لهم مشاكل اجتماعية ومادية كارثية وإحباطات نفسية قد تؤدي للوفاة عند البعض نتيجة ضيق ذات اليد.
وعن اتجاه الفنانين للسوشيال ميديا، فعلقت مريم سعيد صالح: أنا شايفة أن بدل ما اطلع على السوشيال ميديا، أكلم النقيب وأنا بكلمه وبقوله أنا محتاجة شغل، وهو مش بيرشح حد بعينه وبيقول في زميل لينا عايزين نشغله.
وأردفت: مينفعش الفنان يطلع يقول إلحقوني على السوشيال ميديا لأن بيقلل من قيمة الفنان عند الجمهور، ممكن ده يتلم في نقابتنا وأشرف زكي مبيتأخرش على حد.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
