مش كل البعد بعد … بقلم الشاعر الغنائي: حماده العسكري
مش كل البعد بعد
في بعد بيبقى قرب
لكن بشكل تاني
بنكون بعيد عن بعض
وعايش جوانا حب
مش هيموت ثواني
إتفرقت الخطاوي
تملي زمنا غاوي
يشوف دمعة عينينا
يادي السكه الطويله
مفيش بإيدينا حيله
دايما مغلوب علينا
ومين فينا عايش مرتاح مطمن باله
العمر قصادنا عدى وراح ووضعنا على حاله
الدنيا بتبعت لينا جراح على هيئة ناس
الحاجه اللي نحبها دايما مننا بتروح
شكرا ياسنين دايما عايشين جسد بلا روح
بيدق القلب صحيح لكن مفيهوش إحساس
مش كل الضحك فرح
في ضحك فيه بنهرب
من وجع الحياه
وبعدين وياك ياجرح
لإمتى قلوبنا تشرب
من دمع وويل وآه
في أي مكان بنلقى
خطاوي الجرح سابقه
خطاوينا بخطوتين
ياعم الجرح سيبنا
بجد حرام تعبنا
نهرب نروح على فين
ومين فينا عايش مرتاح مطمن باله
العمر قصادنا عدى وراح ووضعنا على حاله
الدنيا بتبعت ليا جراح على هيئة ناس
الحاجه اللي نحبها دايما مننا بتروح
شكرا ياسنين دايما عايشين جسد بلا روح
بيدق القلب صحيح لكن مفيهوش إحساس
