مهندس بدرجة محترف “الباشمهندس” يسري محترف تصوير
حوار: نيفين نصار
يسري أحمد هو شاب مصري طالب في كلية الهندسة صاحب طموح و ابداع رغم بساطة الإمكانيات ولكن اعتمد داخليا على روح الفنان. عشق التصوير منذ الصغر أعطي للتصوير بساطة وللإبداع مزيد من الاناقة. يعتبر لغيره من الشباب قدوة في الإصرار والصمود كي يحصل علي هدفه ولكن نتعرف على رحلة الباشمهندس يسري مع الإبداع الفني بنظرة صورة الفنان.
بدأ الحوار مع الموهوب يسري أحمد كالتالي:
عرفني بنفسك؟
إسمي يسرى أحمد يسرى و عمري ١٩ سنة.
في أي مرحلة دراسية؟
في إعدادى هندسة جامعة عين شمس
اكتشفت هوايتك أمتى ؟
من ٤ سنين تقريبا وأنا في المرحلة الإعدادية لاقيتنى حابب إني أصور الحاجات الطبيعيه شجر و ورد وكدا وكنت شايف الموضوع عادى أنه أى حد يعرف يعمل كدا لحد ما لاقيت الناس شايفه أن صورى مختلفة وحابه انها تشوف صور منى كتير ف دخلت على اليوتيوب واتفرجت على أساسيات التصوير والإيديت و واحده واحده كان فيه تطوير لحد ما وصلت الحمد لله للمستوى اللى أنا فيه.
هل حبك للتصوير أثر على مذاكرتك؟
لا بالعكس خالص.. رغم أني كنت بهرب من المذاكرة ليها وقت الفراغ وكنت ف عز مذاكرتى بصور وبعدل على الصور والموضوع كان ترفيه بالنسبالى.. وبصراحه كنت بحاول اجتهد في مذاكرتي عشان اوصل لهدفي.
التصوير بالنسبه ليك بيمثل إيه ؟
التصوير بالنسبة لي هواية جميلة أوى وباخد الموضوع بالنسبالى تحدى أنى أطلع صور جديده ب إديت جديد وبحاول أكون منفرد بيه يعنى وبحب أحول الصور من أنها تكون مجرد صور عادية لأنها تكون صور تبهر اللى المشاهد.
مين أكتر شخص بيدعمك ويشجعك؟
أمي وأبي وعائلتي وكل صحابي الحقيقة كلهم بيشجعونى واقفين جمبي ودايماََ بيدعموني.
ما هي الصعوبات اللي واجهتك ؟
الحمدلله مفيش حاجة وقفت معايا.. مع العلم عايز اوضح بس أني معنديش كاميرا و أنا mobile photographer يعنى كل الصور اللى متصورة دى متصورة بالموبايل وكل الايديت بالموبايل.
طموحك إيه؟
طموحى انى أكبر الهواية دى وأتطور فيها وأجيب كاميرا.. ويكون البيزنس الخاص بيا وإن شغلي دائماََ يكون مميز ومختلف وأكون من أشهر الفوتوجرافر الموجودين في الوطن العربي.
