نهاية بايخة .. بقلم / حمادة العسكري
ألبوم صورنا من جماله مفيش أخوه
الحب باين في الوجوه
قدام صورنا أسرح وأتوه
وأضرب لبخه
كام صوره لينا ف عز برد وعز صيف
على كام موقف آه ظريف
حكايه لذيذه بدم خفيف
ونهايه بايخه
من يوم ماغاب وعمري ملوش أي طعم
في أي أزمه كان وجوده سند ودعم
وهو جنبي عمري ماشيلت لحاجه هم
قلبي عاش على حسه آه أجمل سنين
في قلبي ساب ذكرى جميله ماتتنسيش
سنين فراق على ذكرى حبه آه بعيش
جوه قلبي قايده نار مابتنطفيش
من يوميها لحد الآن عايش حزين
قدام صورنا بتصحى في قلبي الذكريات
ويمر قصاد عيني اللي فات
وأحضن صورته بالساعات
أهدي الحنين
لو جابوا سيرته وسط كلام أهتم وأسمع
من كتر شوقي ليه أدمع
وأدعي يارب تاني نتجمع
لو يومين
من يوم ماغاب وعمري ملوش أي طعم
في أي أزمه كان وجوده سند ودعم
وهو جنبي عمري ماشيلت لحاجه هم
قلبي عاش على حسه آه أجمل سنين
في قلبي ساب ذكرى جميله ماتتنسيش
سنين فراق على ذكرى حبه آه بعيش
جوه قلبي قايده نار مابتنطفيش
من يوميها لحد الآن عايش حزين
