ولازم كلنا نغفر .. لازم كلنا نسامح .. بقلم / جيهان عكاشة

ولازم كلنا نغفر .. ولازم كلنا نسامح .. ولحد إمتي هنلجم…
جواد قلبنا الجامح

ولازم كلنا نغفر …
ولازم كلنا نسامح.
ولحد إمتي هنلجم…
جواد قلبنا الجامح.
كفاية عند ومكابرة..
كفاية نحب ونقاوح.
حقيقي قلوبنا مقهورة..
وأحلامنا غير الصورة..
وحاجات جوانا مكسورة..
وكله في دنيته سارح.
ونكتم بالحشا بوحنا..
وخلاص سلمنا لجروحنا..
وكتير نضحك علي روحنا..
ونقول أصل الزمن جارح.
وغصب عننا بنعشق…
حاجات جوانا بتشقشق..
وسهم الحب لو يرشق…
ينسينا أسي إمبارح.
ومين ماعاشها متغرب..
ولا بيبعد ولا يقرب…
وبرضه فضل يشرب…
من بحر الهوي المالح.
ومهما العشق يدبحنا…
ونبض قلوبنا يفضحنا.
بتنهيدة نسد الباب..
وهو بدربنا رامح.
ولحد إمتي هنخبي..؟
ونملي قلوبنا ونعبي..
نموت زهرنا الوردي..
ويعيش فينا الوجع طايح.
ونستسلم لمصايرنا…
يتوه في الزحمة تفكيرنا…
قوليلي إمتي يا أقدارنا …
ناوية إنتي وإحنا نتصالح ؟