- ياسر صادق عاشق المسرح في حوار خاص مع جريدة عالم النجوم
ياسر صادق أنا مشغول بالتاريخ وحفظ التراث المسرحي وتوقعت النجومية لـ محمد رمضان في بداية عمله
حوار / دعاء نصر
ياسر صادق ممثل ومخرج مسرحي قدم العديد من الأعمال في التلفزيون والسينما والمسرح ، تخرج من كلية التجارة شعبة إدارة الأعمال عام ١٩٨٥ و ترأس فريق التمثيل بالكلية ، وحصل على العديد من الجوائز، بالمسرح الجامعي ثم التحق بالمعهد العالي للفنون المسرحية “قسم التمثيل والإخراج” وتخرج منه عام ١٩٩٤ بتقدير جيد جداً ، وشغل منصب مدير عام المسرح الحديث وحالياً يشغل منصب وكيل وزارة الثقافة و رئيس المركز القومي للمسرح والموسيقى والفنون الشعبية
الفنان ياسر صادق بما ان حضرتك عاشق للمسرح ورائد من رواده و بعد تعينك رئيس المركز القومي للمسرح إيه الجديد اللي حضرتك بتقدمه للمسرح؟
انا مشغول بالتاريخ وحفظ التراث ونشر كتب في مجالات المسرح والموسيقى والفنون الشعبية وبنعمل مجلة المسرح ونقدمها للدار السادس العدد اللي طلع بعد التوقف خمس مرات في المرة دي اول مرة المركز يبقي متولي مجلس إدارة المسرح.
الفنان ياسر صادق كممثل ايهما تفضل العمل بالدراما ولا السينما ولا المسرح؟
المسرح هو الأساس. الممثل الذي لا يقف على المسرح لا يفقد كثير من قيمته وموهبته المسرح ده كاشف مفيش ضباط مفيش تعديل مفيش تغير بيكون انتي والجمهور يا بتاخدي استحسان فوري بتاخدي رفض فوري من الجمهور في المسرح أقيم واهم واعمق لكن النجومية نجم السينما اعلي أفيش السينما نجم السينما هو أعلى نجم عن الدراما التليفزيونية عن المسرح كان زمان بقي في بداية الخمسينات والستينات كان المسرح هو رقم واحد حتي التليفزيون كان لسه مفتحش إنما الآية دلوقتي اختلفت لكن المتعة بالنسبالي التمثيل في المسرح إنما النجومية السينما.
اية اللي مفتقده المسرح عشان يرجع زي زمان ويقدم محتوى ومضمون هادف ويكسب جمهور ومشاهدة عالية مرة ثانية؟
اولا مسرح الدولة مسرح فقير لان احنا الميزانيات مش عالية لان عارفة الدولة اقتصادها مش عالي و لسه طالعين من كوارث فالنجوم بتعاني جدا في أجرها فمش هينفع تاخد الأجور دي في المسرح طبعا انما الحركة المسرحية دلوقتي افضل بكتير من الاول لان المسرح قائم بشباب وقائم بأناس اقل نجومية بس المسرحية بتحقق وبيستمروا وبيجلها جمهور وليها رواد بس طبعا لو النجوم أدوا ما عليهم للبطل وللمسرح كاب للفنون يعني هيفرق كتير جدا.
بمناسبة الشباب مين من النجوم من الشباب بيعجبك أدائه واختياراته ممكن تشاركه في عمل من أعماله؟
زي مين يعني؟
اللي موجودين على الساحة حاليا.
اقول لحضرتك مثال
اه قولي مثال
بيعجبك محمد رمضان؟
محمد رمضان انا اول واحد قدمته في بطولة في 2011 في في ايه يا مصر علي مسرح الفران فقلت وأنا بشغله معايا كان لسه طبعا محققش حاجه فقلت لهم دا هيبقى نجم، ونجم مهم والحمد لله صدق حسي يعني.
طيب جميل اية اكثر عمل عملته كان قريب لقلبك؟
في المسرح ولا في التلفزيون ولا في السينما؟
في السينما عملت فيلم مع الاستاذ اسامة فوزي الله يرحمه اسمه بالألوان الطبيعية.
اكيد حضرتك اشتغلت كتير مع نجوم كتير مين الفنان اللي ممكن حضرتك تحب أنك تشاركه في العمل تاني؟
محمود حميده عملت معاه فيلم دانتيلا ومن النجوم المهمين جدا يعني خلقا وفنا
حضرتك شاركت في مسلسل الفتوة ؟ كنت متوقع نجاحه بالشكل ده وقولى رأيك في ردود فعل الناس عن المسلسل؟
اه طبعا .. والله انا كنت متوقع نجاح المسلسل من اول ماشوفت الديكور والمخرج كمان المخرج مخرج متميز جدا يعني الاستاذ حسين المنباوي مخرج عظيم وياسر طبعا زميلي وعشرة عمري ودفعة وحدة وإنسان كويس اوي.
كان في رياض الخولي وأحمد خليل وأحمد صلاح حسني يعني تحقق المطلوب وزيادة ف لا كنت متوقع نجاحه بس يعني هو نجاحه عند الناس كان اكثر يعني الناس كانت متقبلاه بشكل افضل لان كان لابس البيئة المصرية اوي يعني كان في مسلسلات متحسيش انها مننا اه فعلا كانت بعيدة عننا كل البعد انما ده تحسي انه قريب من البيئة المصرية وجاي في جو يعني القديم جدا في اوائل القرن 19 معالجين الموضوع كويس اوي.
طيب بالنسبة للأعمال الدرامية اللي اتقدمت في رمضان السنة دي. اية اكثر عمل جذب إنتباهك وتابعته اية العمل الجيد بس مخدش حقه؟
اكثر عمل غير الفتوة طبعا، ههههه طبعا مش هنقدر نتكلم الفتوة عجبني جدا، في 100 وش كان مسلسل لطيف ده لفت انتباهك اه ده عمل كويس اوي.
ايه العمل الجيد اللي مخدش حقه؟
مسلسل ليالينا
حضرتك ممكن تحكيلنا عن متحف مقتنيات النجوم فكرته جت ازاي ياريت بكل تفاصيله بعد اذنك؟
متحف النجوم ده مقتنيات النجوم ده كان مشروع الوزيرة الاستاذة الدكتورة إيناس عبد الدايم وده كان يمكن من اول ما تعينت في المركز وهي موجهاني للحكاية دي ان احنا عاوزين نعمل متحف كبير لرموز الفن والحفاظ على مقتنياتها والحفاظ على التراث والاوية المصرية وكده بدأنا نشتغل علي ده والمركز أساسا في متحفي و في صور تراثية مهمة جدا وفي مقتنيات لبعض النجوم مش كلهم و ملابس ارتدوها علي المسرح مثل يوسف وهبي امينة رزق علوية جميل جورج ابيض أسماء مهمة
فبدأنا نرسخ الفكرة وبدأت ازود المقتنيات ان احنا نقدر نعمل متحف كبير جدا يضم رموز ورواد المجالات الثلاثة المسرح والموسيقى والفنون الشعبية زي ماقولت لحضرتك وبدأنا نعمل سيشنات اجنحة خاصة بالمركز في كل المسارح تابعة لوزارة الثقافة بحيث اننا نقدر نعرض بعض المقتنيات والصور والملابس ويبقي منفذ دائم لبيع إصدارات الكتب المتخصصة في المجالات الثلاثة التابعة لينا و قاعدة بحثية تفيدنا وتفيد الباحثين وتفيدنا في كتابة التوثيق المسرحي وكتابة التراث المسرحي اللي بنعمله سنويا فعملنا جناح لمسرح السلام في القصر العيني تابع لفرقة للمسرح الحديث فكل نسرح بنعمل فى البارتيشن ده بنوثق الخشبة وبنوثق المسرح وتاريخه وبدايته واهم الاعمال اللي قدمت فيه فالمسألة مسألة تقنية وبحثية في المقام الاول
يستكمل الفنان ياسر صادق حديثه :
وبعدين بنقدم الشق المتحفي اللي هو في ملابس تراثية للنجوم اللي اشتغلوا علي الخشبة دي وصور من اعمالهم للي اشتغل علي الخشبة دي بالأضافة الي شاشة ليعرض عليها بعض من الاعمال اللي اتعملت منذ افتتاح المسرح ده مقتطفات كده وبيعرض عليها مديرين المسرح بفتراتهم بشكل بحيث ان يبقي مركز تعريفي للجمهور حتي بالمسرح ومين إدارة والنجوم اللي تولوا إدارة المسرح وعملوا اية في فتراتهم وكده دا في مسرح السلام في القصر العيني مسرح فاطمة رشدى في العايم مسرح الطليعة مسرح متربول مسرح القومي للطفل مسرح الغد في العجوزة مسرح البلون نفسه عندنا قسم الفنون الشعبية السيرك القومي معمول برده متحف وفيه بعض المقتتفات لعايلة الحلو وعائلة ياسين وعائلة عاكف يعني مهم جدا الحكاية دي.
واحنا مازلنا بنجمع المقتنيات والفترة الاخيرة جمعنا تقريبا اقل من شهر جمعنا 18 رمز من رموزنا
اية الجديد والحصري للفنان ياسر صادق خلال الفترة اللي جاية؟
الجديد ان بعمل رواية من اخراجي اسمها لحظة حب تبع البيت الفني للفنون الشعبية والاستعراضية وان شاء الله هنعرضها سيزون يعني وهتتطور وده عرض رومانسي جدا بعد طبعا شوطة كورونا بعد فترة الحظر والعزل في البيت والعلاقات الزوجية والإنسانية اصابتها الكورونا محتاجين نرجع للرومانسية شوية فقلنا لازم نعمل عرض رومانسي يهون 3 و 4 شهور اللي فاتوا وهو عرض مهم بطولة منال سلامة وبهاء ثروت وميوزك رومانسي كده لرامي لطيف بالتوفيق يارب
تحب تقول اية لمحبينك ومتابعينك بمناسبة عيد الاضحى المبارك وايه اللي بتتمنيه يحصل قبل ما تخلص 2020؟
نفسي ربنا سبحانه وتعالى يزيح الغمة دي من العالم كله وتعود للحياة الطبية والجمهور يرجع يملي المسارح والسينمات واملي ان مصر تبقى من ضمن الدول المتقدمة بإذن الله
حضرتك مقولتش تحب تقول اية لمحبينك ومتابعينك بمناسبة عيد الاضحي؟
اقولهم كل سنة وهما طيبين وكل مصر طيبة وعيد اضحى سعيد على كل الناس اجمعين مسلمين ومسيحيين وكل خلق الله انشاء الله وربنا مايحرمني منهم ابدا
الفنان ياسر صادق علي خشبة المسرح
