عبير سعيد في حوار خاص مع عالم النجوم: نفسي أعمل حاجه للطفل

إعداد وحوار / دعاء نصر

الفنانة عبير سعيد “عبير فاروق” ممثلةممثلة مصرية. بدأت العمل الفني سنة 1997 من خلال دورها في المسلسل الشهير “عائلة ونيس” في دور إصلاح “أم مصري” و التي تألقت فيه ببراعة. المسلسل بطولة الفنان محمد صبحي والفنانة الراحلة سعاد نصر. استمرت بالتمثيل مع الفنان محمد صبحي حتى أصبحت واحدة من أفراد فرقته المسرحية والتلفزيون.

ومن أبرز أعمالها المسرحية: مسرحية كارمن و سكة السلامة و مسرحية لعبة الست . كما شاركت في العديد من المسلسلات التليفزيونية: هربانة منها، كفر دلهاب، سرايا عابدين. الدجال، سيرة الحب، الفتوة ، في غمضة عين، البحر و العطاشة ولاد تسعة، الزيبق، ظل الرئيس، كابتن أنوش. راجل و ست ستات، عيون القلب، أبو البنات، المغني، بنات سوبر مان، وغيرها من الأعمال.

الفنانة عبير سعيد ايه رأيك في الدراما اليوم ؟

الدراما اليوم مش هي الدراما بتاعة زمان يعني أنا حابة أن الدراما تبقي أحسن وافضل من كده بكتير. نفسي كل الناس يرجعوا تاني والرقابة تشوف وتقنن المشاهد، الحاجات اللي ماشية مع مجتمعاتنا وعاداتنا.

زى ونيس وأسامة أنور عكاشة واللمة والعيلة يبقى رمضان فيه بهجة ومايكونش فيه كل الكميات بتاعة المسلسلات دى . يبقي عشان الناس تشتغل ماينفعش اه نقنن المسلسلات بس عايزة كده.

علاقة الفنانة عبير سعيد بالطفل ؟

علاقتي بالطفل انا طبعا بحب الأطفال جدا ونفسي أعملهم أي حاجة. كان فى زمان أيام عارفه فؤاد المهندس أما كان بيعمل عمو فؤاد وعبد المنعم مدبولي لما كان بيعمل جدو عبده. عايزين نهتم بالطفل شوية .. فؤاد المهندس وعبد المنعم مدبولي كانوا عاملين جو حلو للأطفال عاش عليها أجيال متربين علي القيم والأخلاق. نفسي المسرح بتاع الطفل يشتغل تاني ويعمل حاجات حلوة ومسرحيات حلوة للطفل يفهمها وتبقي كويسة وتبقي ممتعة ماتبقاش اى حاجة أو تقضية واجب أو سبوبة.

حقيقي نفسي أعمل حاجة للطفل لأن الأطفال أصبحوا مظلومين بشكل محزن، بقوا بيتفرجوا على نينجا ومش عارف جريندايزر ومش عارفة إيه. وقتل وضرب لما الأ طفال خلاص بقى عندهم عنف، ومفيش سيطرة عليهم لان مفهوم براءة الطفولة عندهم أختلف بسبب مايشاهدونه. لذلك لابد من مساعدة الأطفال لان أطفال اليوم هما جيل بكرة والمستقبل، هم من سيقدون حركة التنمية، هما المخزون البشري الاستراتيجي اللي لازم ولابد من حمايته من الأخطار والعقوبات، والطاقة السلبية المؤثرة علي حياته ونفسيته. لذلك لابد أيضا من أننا نهئ البيئة الصالحة لكي ينشئ نشأة صالحة تؤهله ليكون فرداً سوياً مشبع بالقيم والأخلاق، وعنده رصيد نفسي صحي كفيل ان يجعل منه إنساناً مكتمل النمو العقلي والنفسي والجسدي أيضا.أطفالنا قطعة مننا ولا يستحقون منا إلا الحفاظ عليهم.

تحبي تقولي ايه لكل أم بمناسبة عيد الأم ؟

الأم دى مدرسة وكلنا لازم نحترمها ونقدرها، الواحد من غير أم ميسواش، دي البني أدم الوحيد اللي يحب يشوفنى أحسن منه ذات نفسه محدش تانى هيحب كده بتتفانى عشانا الله يرحمه كل الأمهات اللي توفوا ويحمي كل الأمهات اللي عايشين ويصبر كل اللي فقد أمه لان الأم دى الحنية والدعا واللي الواحد لو هي راضية عنه الحياة كلها بتبقى كويسة و طبعا ربنا أوصى بالوالدين وقالك أمك ثم أمك ثم أمك ثم أبوك فده بالنسبة للأم.