هشام نادي “الشاب المقبل على الحياة”: أنا عندي من العمر 13 سنة
156 شهر واللي جاي أحلى زي النهاردة من 156 شهر (13 سنة) إنتهت حياتي الأولي بعد 20 سنة و6 شهور و28 يوم من ولادتي وهو نفسه اليوم اللي إتولدت فيه حياتي التانية وعشان كدا تاريخ ميلادي اللي في البطاقة الشخصية مبقاش مهم بالنسبالي ولا بيلفت انتباهي, وطبعاً ولا بحتفل بيه
كتير منكم ممكن يندهش لما يلاقيني متقبل الكلام عن يوم الحادثة وتفاصيله. وده طبيعي لأن مفيش عاقل هيتقبل ذكرى أليمة بترحاب معاكم حق مفيش عاقل هيتقبل حاجة كدا بس دي لو كانت ذكرى أليمة فعلا أنا مش بعتبر اليوم ده يوم مؤلم بالمعنى السلبي أنا بعتبر ألمه ناتج عن إعادة تأهيل ليا ولقدراتي
لأني رافض رفض قاطع إني أصنف حادثتي على إنها عقاب / إبتلاء / محنة إلخ من التصنيفات الغبية الكارثية دي أنا ببساطة شايف حادثتي ما هي إلا إعادة توظيف ليا بمعنى إن قبل الحادثة كنت بشتغل وبدرس وشخص إيجابي نافع ولكن قدراتي وإمكانياتي كانت مدفونة في كارير صغير محدود
وبالحادثة إنتقلت لكارير مناسب نوعاً ما للقدرات والإمكانيات بتاعتي. والمطلوب مني إني أكون شخص إيجابي نافع في الوظيفة الجديدة دي وبس
وعشان كدا مش بس متقبل لذكرى الحادثة .. لألأ ده أنا ممكن أحتفل بيه كمان ويكون يوم ليه معنى عن يوم ميلادي. وبالمناسبة السعيدة دي أحب أكلمكم عن طباعي شوية
1- أنا من الناس اللي بتفكر في نطاق قدراتها اللي بتمتلكها وبس يعني لما بقرر أعمل حاجة أو أشتري حاجة أو أجرب حاجة مبحبش أستعين بقدرات حد تاني غيري وعشان كدا مهما عرفت ناس مقدرش أستغل معرفتي بيهم في تسهيل أمر معين (بعتبر ده وسطة أو مصلحة) أو إن حد يدفعلي تمن حاجة ناوي أشتريها أو إني أستغل مهارة حد في شيء عشان أوفر فلوس أو وقت لتعليمها اعذروني معقد بقى
2- أنا من الناس اللي عندهم فقر شديد في الفراسة, يعني مبعرفش أقرا الكلام اللي ما بين السطور, ولا أنا لبيب عشان أفهم بالإشارة. وبالتالي الكلمة المباشرة الصريحة الواضحة هي اللي هفهم منها قصدك إيه. وهي اللي بقولها لو عاوز أوصل للي قدامي حاجة
وللأسف ده خلاني ضحية لمواقف كتير إتعاملت فيها بمباشرة. وتضررت بسببها, أو أوحيت لغيري بأشياء. وهمية اترتب عليها نمط معين من طرق التفاعل معايا
3- أنا بحب كل الناس وبقبل صداقة كل الناس وبتعامل بعفوية شديدة وكتير من الأصدقاء نصحوني بتغيير السلوك ده, وإني لازم أكون حذر ومديش الأمان للكل بالشكل ده. وأنا للأسف مش عارف, الحاجة الوحيدة اللي بعملها لما بلاقي حد طلع مش. ولابد بلغي صداقته في النهاية أنا مبسوط بتواجدي معاكم. وأتمنى لو كنت أسأءت لحد فيكم يسامحني وطلب أخير ..
خليكم موجودين معايا. ومتقطعوش عادة دعمكم وتشجيعكم. ومساندتكم ليا ودعواتكم ليا بالتيسير والتوفيق في اليوم / الشهر / السنة / الـ10 سنين اللي جايين.
