البنت حلوة.. بقلم : حمادة العسكري
البت حلوة وحلاوتها
مش طبيعية
قوامها حلو ورقتها
زايدة شوية
بصراحة كدة أنا حبيتها
وشغلت بالي
يوماتي حافظ مواعيدها
وبستناها
بحلم في يوم أحضن إيدها
وأبقى معاها
البت حلوة وأنا رايدها
تبقى حلالي
لما بشوفها بحس بتوهه
ياناس روحوا بسرعه نادوها
عايز أعرف عنوان بيتها
وأروح أشرب شاي مع أبوها
خطفت قلبي بنظرة عين
بت مفيش منها إتنين
عينيها قناصة ونظرة رصاصة
طالعة وعارفة هترشق فين
حلوة البت وعيني منها
رايح جاي قصاد عينها
لو غابت بسأل عنها
وم الناس بعرف أخبارها
حلوة بجد ومختلفة
حلوة وإكمنها عارفة
سايقة دلالها ولا على بالها
ولا حد بيلفت أنظارها
, ************
البت حلوه وعجباني
مزغللة عيني
واخدة عقلي وشغلاني
وقايدة حنيني
سيرتها دايما في لساني
وليها بعيش
خدودها ورد وشفايفها
بطعم التفاح
الشعر بيغطي كتافها
وطاير سواح
خمسة في عين اللي يشوفها
ومايسميش
كله في كفة وهي كفة
جمال وشقاوة ورقة وخفة
نفسي أعيش العمر معاها
وبين أحضانها أنام وأتدفى
أجمل بت عينيا شافتها
قلبي بيرقص على خطوتها
أنا مقدرش أبعد وأنساها
بحلم أصحى وأنام على صوتها
حلوه البت وعيني منها
رايح جاي قصاد عينها
لو غابت بسأل عنها
وم الناس بعرف أخبارها
حلوة بجد ومختلفة
حلوة وإكمنها عارفة
سايقة دلالها ولا على بالها
ولا حد بيلفت أنظارها
