إتجاهلني.. بقلم / الشاعر حمادة العسكري
إتجاهلني سهل عليا الحكايه
خليني أحس إني غريب وإنت معايا
خليني أشوف نفسي في عينيك بصوره وحشه
إبعدني أكتر سهل فراقك والنهايه
ساعدني أنسى ماتحسنيش خليني أمل
زود قسى يمكن حنيني ليك يقل
من كتر وجعي أكيد هفوق في لحظه وأمشي
مين اللي يقبل إن قلبه يعيش في ذل
بيع قلبي بأرخص الأسعار
في مزاد علني يتعرض
ماتسيبش ليا الإختيار
خلي القرار دا يتفرض
خليني أشوف فيك الإصرار
ماتدنيش فرصه أعترض
كتر خصام خلي الكلام بنا بحدود
إهمل وكبر ضايقني أكتر بالردود
خليني أقدر إني أعيش بعدك وأكمل
من غير ماأحن ولا إني أفكر يوم أعود
إبني بينا ألف سد وألف سور
إمحي فيا أي إحساس أو شعور
كسرت قلبي بسم المحبه والهوا
ومفيش دوا يقدر يعالج الكسور
بيع قلبي بأرخص الأسعار
في مزاد علني يتعرض
ماتسيبش ليا الإختيار
خلي القرار دا يتفرض
خليني أشوف فيك الإصرار
ماتدنيش فرصه أعترض
