الفنان أدهم عادل: حلمي أفتح معرض رسم كبير وأعلٌم الموهوبين وأشارك في مسابقات عالمية
حوار: أحمد الدخاخني
أدهم عادل محمد, فنان تشكيلي شاب من أبناء مركز القوصية التابع لمحافظة أسيوط, وهو الآن طالب بكلية اللغة العربية شعبة التاريخ والحضارة بجامعة الأزهر, والذي يبلغ من العمر 21 عاماً, فمنذ صغره يعشق ” أدهم” الرسم ويبدع فيه حتى أنه يستخدم العديد من الأدوات والخامات في تصميم اللوحات والصور مثل الرصاص والفحم أو المزج بينهما بجانب الرسم بالشاي, وأيضاً التفنن في الرسم على حائط منزله باستخدام الطباشير كلوحة فنية فرآه شقيقه ” أيمن عادل” فأعُجب به جداً, وحصل على عدد من الجوائز على مستوى المحافظة والجمهورية ويسعى نحو تطوير ذاته وتحقيق أحلامه في عالم الفن التشكيلي.
وفي حوار خاص تواصلت ” عالم النجوم” مع الفنان التشكيلي أدهم عادل, للحديث عن بداية اكتشافه لموهبة الرسم وعن الصعوبات التي واجهها بجانب أحلامه الكبيرة التي يتمنى تحقيقها, كما يلي:
متى اكتشفت موهبتك في الرسم ؟
أنا برسم من وأنا صغير بس ماكنتش أعرف أنها موهبة, فكنت برسم في المعهد وشافتني مدرٌسة الرسم وقالتلي ما شاء الله رسمك جميل وأنت موهوب ففرحت جداً, بعدها رجعت البيت ورسمت بالطباشير علي حائط المنزل فشافني أخويا البشمهندس أيمن عادل وقالي إن رسمي حلو وشجعني أني اكمل فحبيت الفكرة وخدت فترة كبيرة وأنا برسم واستمريت فترة قصيرة جداً وبعدين بعدت عن الرسم فترة طويلة ولما كبرت شوفت ناس كتير بترسم وتنزل أعمالها علي السوشيال ميديا فحبيت أني أرجع أرسم تاني وبالفعل رجعت وأنا في الصف الثالث الثانوي ولغاية الآن برسم وكنت بتفرج علي فيديوهات علي اليوتيوب والحمد لله كنت بطور من نفسي.
ما هي الصعوبات التي واجهتها في أثناء ممارستك للرسم ؟
المشكلة اللي قابلتني أن أهلي في الأول كانوا رافضين فكره أني أرسم, وأنا في الدراسة كانوا بيقولولي أن الرسم هيأثر علي دراستي وكانوا عاوزيني أبعد عن الرسم وأركز في دراستي لغاية ما اثبت لهم أني هقدر أوفق بين الدراسة والرسم والحمد لله اثبتت لهم ده بالفعل واقتنعوا وبقيوا بيشجعوني أني أكمل.
ما هي الأدوات التي تستخدمها في الرسم ؟
أنا بستخدم خامات كتير زي الرصاص والفحم وساعات بدمج الرصاص مع الفحم وبرسم بالشاي والفحم برضه وبرسم بالألوان الخشب والجاف وبرسم جرافيتي.
كم الوقت تستغرق في رسم صورة ؟
علي حسب الرسمة كل رسمة وبتاخد وقتها يعني مثلاً في رسومات بتاخد معايا 5 ساعات أو يوم وفي رسومات بتكون فيها تفاصيل كتير في بتاخد معايا حوالي يومين أو تلاتة.
من هم أكثر الناس تشجيعاً لك في حياتك؟
الحمد لله في ناس كتير بيشجعوني زي أخويا الكبير البشمهندس أيمن وأهلي والبعض من أصحابي.
هل حصلت على جوائز أو تكريم ؟
دخلت معارض رسم كتير ومن ضمنهم معرض لوحات عالمية ودخلت مسابقات كتير ومن ضمنهم مسابقة أخدت فيها مركز أول على مستوى مركز القوصية ومسابقة خدت فيها مركز ثاني علي مستوى محافظة أسيوط ومسابقة نجم الصعيد وخدت مركز ثاني علي مستوى الجمهورية وطلعت لقاء علي التلفزيون مع الإعلامي أسامه زيادة في برنامج بصمة مصرية.
ما هي أحلامك الكبيرة التي تسعى لتحقيقها ؟
إن شاء الله في المستقبل عايز أشارك في مسابقات عالمية وعايز أفتح معرض رسم كبير وأعلٌم الناس اللي عندها الموهبة وتنميتها وأي حد حابب يتعلم الرسم.
