علا صقر.. فنانة تشكيلية تسعى لـ العالمية

حوار: أحمد الدخاخني

علا عبد الحميد صقر, فتاة فنانة تشكيلية من طنطا بمحافظة الغربية, والتي تبلغ من العمر 17 عاماً, حيث تتفن علا في موهبة رسم الصور التعبيرية على اللوحات الفنية, وقامت بتأسيس مبادرة ” لون ابتكر ” بغرض التشجيع على اكتشاف موهبة الرسم عند الأطفال ودعم أولياء الأمور لذلك, كما تشارك الفنانة التشكيلية في الدورة الثالثة لمعرض ” بنت الورد” باشتراك عدد كبير من الفنانين على مستوى جميع محافظات الجمهورية, ليكون أول عرض لها على مستوى العالم العربي عن ” والت ديزني ” في قصر الأمير محمد علي بالمنيل, والذي بدأ في 13 سبتمبر الجاري ويستغرق لمدة 15 يوماً, حيث تشارك فيها علا بلوحة فنية متميزة ومختلفة.

في حوار خاص تواصلت ” عالم النجوم ” مع الفنانة علا صقر للحديث عن بداية مشوار اكتشاف موهبتها في الرسم على اللوحات الفنية.

متى اكتشفتي موهبتك في الرسم ؟

عندى موهبة الرسم من صغرى ودايماً كنت حريصة على متابعة فيديوهات تعليم رسم للمبتدئين خطوة بخطوة ومكنتش متابعة أسلوب معين وكل معلوماتى عن الرسم أنه مجرد هواية بسلي بيها وقتى وبحبها, ولكن متوقفش على ده وبدأت أنميها من أربعة سنوات لما عرفت يعنى ايه فن وأهميته, وكل ده بالبحث الذاتي وكانت بدايتى إنى أتعلم نسب الوجه وأساليب التظليل وغيره وبدأت موهبتى تتطور كل يوم عن اللى قبله عن طريق التدريب الدائم والتغذية البصرية.

ما هي الأدوات التي تستخدميها في الرسم ؟

بدايتى كانت بقلم رصاص بس وكل فترة بتعرف على أنواع وخامات جديدة وبيبقى عندى شغف كبير جدا انى اتعلمها, وأخدت وقت كبير فى الرصاص فقط لحد ما تعلمت أساسيات وأتقنته كويس وبدأت ارسم بالفحم وبألوان البوستر والألوان الخشب والمائية وسوفت باستيل وغيره وكل ده تعليم ذاتى ولسة مستمرة في أنى أجرب جميع الخامات علشان أقدر أكتشف أسلوبى الخاص فى الخامة اللى هتبقى مفضلة عندى ولحد دلوقتي خامتى المفضلة هى سوفت باستيل طباشيري.

هل هناك صعوبات تواجهيها أثناء الرسم؟

لا, وأعتقد أن كل واحد طالما بيحب المجال اللى شغال فيه أياً كان هتبقى كل حاجة سهلة بالنسبة له, هو يمكن فى بدايتى وفكرة أنى أتعلم ذاتى أخدت وقت طويل جداً ومجهود ولكن كنت مستمتعة وأنا بكتشف كل تكنيك وبطبقة بأسلوبى وبلمستى.

متى قمتي بتأسيس مبادرة ” لون ابتكر ” ؟

الفكرة جاتلى لما حسيت إن الإهتمام بالفن بيبدأ من سن كبير وإنى لما بدأت أرسم محدش فهمنى يعنى ايه رسم وأهميته ودايماً الكل شايف أن الرسم ده تعطيل عن المذاكرة وأنه لازم يكون فى وقت الفراغ وبس وميعرفوش أنه بيساعدنا على التركيز وبيزود ثقافتنا وخاصة الأطفال, فوقتها حبيت أكون سبب أن الأطفال تعرف ايه هو الرسم والتلوين وازاي يقدروا يعلٌموا نفسهم بنفسهم وإنى اتكلم مع أولياء أمورهم وأعرفهم ازاي يكتشفوا موهبة إبنهم ومش شرط رسم بس, وأسستها يوم 30/6/2021 وبدأت مبادرتى من حديقة الطفل بطنطا لأن ده أكتر مكان هيساعدنى إنى أوصٌل فكرتى لعدد أكبر من الأسر والحمد الله نفذتها وعملت مسابقة أن اللى هينزل رسمته على هاشتاج لون ابتكر هيكون ليه هدية لأحلى رسمة ولاحظت إقبال شديد من الأطفال وحماس أنهم يرسمون ويلونون وكمان أسرتهم وعملت فريق عمل فى جميع المحافظات وإن شاء الله هيتم التنفيذ فى أقرب وقت.

من هم أكثر الناس تشجيعاً لكِ في حياتكِ ؟

طبعا أسرتى كلها شجعتنى ودايماً فخورين بيا منذ البداية ومن أول طريقى قابلت ناس كتير جدا بتشجعنى وغيرهم بينتقدنى وده كان أكبر دافع ليا إني أنجح وأوصل للى انا فيه ده وأنا عندى 17 سنة وطبعاً مش الكل تشجيعه مستمر ولكن فى منهم من لا يكل ولا يمل من تشجيعى ولهم فضل كبير عليا بعد ربنا الحمد لله.

هل هناك جوائز حصلتي عليها ؟

من اول بدايتي وأنا مهتمة إهتمام شديد بالمسابقات وكانت أول مسابقة أخذت مركز أول على مستوى إدارة السنطة وكان دافع كبير ليا إنى أستمر ووقتها حسيت إنى بدأت أطلع لفوق والحمد الله مستمرة على ده, وشاركت مسابقات كتير جداً لا حصر لها وكان مميز بينهم مسابقة الطفل المبدع الصغير سنة 2018 على مستوى وسط الدلتا وأخذت مركز واتكرمت من السيد اللواء هشام السعيد محافظ الغربية السابق, واتصعدت للتصفية النهائية على مستوى الجمهورية فى مسابقة talent بالعربى كممثلة لمحافظة الغربية وكانت تجربة فريدة من نوعها, وعملت لقاء تليفزيونى فى نهاية السنة الماضية, وشاركت في العديد من المعارض منها معرض لوحة لكل حي ومعرض white rose 3 , ومعارض عن طريق المسابقات وغيرها كتير, وشاركت فى مسابقة الكاريكاتير للأزهر الشريف ومسابقة “يلا نرسم آثارنا “, ومسابقات أخرى أخذت فيها مركز أول الحمد لله وحصلت على ميداليتين و ثلاثة دروع وكأس والكثير من شهادات التكريم, وبشارك في معرض ” بنت الورد ” مشترك فيه عدد كبير من الفنانين على مستوى جميع محافظات مصر ودى الدورة الثالثة له وبشكل مختلف هيكون اول مرض على مستوى العالم العربى عن والت ديزني وهيكون فى قصر محمد على فى المنيل ومشاركة فيه بلوحة هتكون متميزة جدا إن شاء الله خير.

ما هي أحلامك الكبيرة التي تسعى لتحقيقها ؟

أول وأهم حاجة أنى أعرف علا صقر وايه هى أكتر خامة أقدر أركز عليها ويبقى ليا لمستى الخاصة بحيث أى شخص يشوف لوحة ليا يقدر يميزها أنها لوحة علا صقر, وطبعا أنى أكون مثل أعلى لعدد كبير من محبين الفن يوماً ما إن شاء الله وأكون فنانة عالمية, وأتمنى اشارك في معرض world art في دبي ومعارض أخرى عالمية ويكون ليا معرضي الخاص اللى أقدر أساعد بيه الفنانين اللى زيي واللى نفسهم يطلعوا للنور.