أريد حلاً… بقلم: نيفين نصار
كنت بحب زميلتي في الجامعة 3 سنين ولما تخرجنا خطبتها ونظرا لظروف حصلتلي طولت الخطوبة 3 سنين ومقدرتش اجيب شقة لظروف مرض أمي وأبويا في نفس الوقت والحالة كانت صعبة جداً وهما قرروا يفسخو الخطوبة علشان قالو اني عطلت بنتهم كان زمانها اتجوزت وخطيبتي وقتها موفقتش جنبي زي ما تكون زهقت مني وفسخ الخطوبة كان بعلمها وبعدها بشهرين اتخطبت وحاليًا متجوزة وعندها أطفال وأنا سافرت السعودية و ربنا كرمنى الحمد لله وأمي ربنا انعم عليها بالشفاء لكن بابا توفى الله يرحمه وانا سافرت من 4 سنين وكنت متعقد من الجواز ومش بفكر فيه نهائي حاليًا انا في اجازه خطيبتي السابقة كان لها اخت أصغر منها بسنتين
والبنت دى بعتتلي وأنا مسافر وصار بنا كلام وهي حبتني وأنا بالنسبالي عادي فهل ينفع اني أتقدم لها واخطبها هي فاتحت أهلها والغريبة انهم موافقين ومرحبين حتى أختها عرفت انها مش معترضه فانتم ايه رأيكم أنا داخل على30 سنة وهي 28 وهل موافقتهم ديه علشان البنت اتأخرت في الجواز مثلا.
ولا علشان البنت ضغطت عليهم ومش عارف ازاي هقابلهم بعد اللي حصل منهم والموقف هيبقى حلو ولا وحش عاوز رأيكم اتصرف ازاى و شكرا جدا
حل المشكلة
اولًا: أوعي تناسب العيلة اللي معندهمش مبدأ وبتوع مصلحتهم .
ثانيًا: كنت بتحب واحده زمان راجع دلوقتي تتجوز اختها مش خايف من الحنين انك ترجع تحن وتفتكر ذكريات زمان وتقع في الخطيئة .. ووقتها الشيطان الذي يسيطر والعياذ بالله .. الغريب أن الكل موافق حتي حبيتك القديمة
ثالثًا: هما عيلة بتوع مصلحتهم ويهمهم المصلحة فوق أي اعتبار يعني رفضوك في الاول عشان ظروفك صعبة .. دلوقتي لما الظروف بقت حلوة سلطوا عليك بنتهم .. ناس مش عندهم مبدأ .. الجواز بالنسبة ليهم سبوبه، ابعد وربنا يعوضك بالأفضل
