أريد حلاً بقلم: نيفين نصار
أنا متزوجة وعندي 29 سنه متعلمة وعلى قدر من الجمال الحمد لله وعندى اطفال .. وبحب جوزي جدا والمفروض أنه بيحبني .. لغاية لما بدأ شغل بمشروع جديد وشارك سيدة
وهى متزوجة من وقت الشراكة دى وهو متغير معايا جدااا وانا مش عارفه في ايه .. بس طبعا لاحظت أن فى كلام كتير عالخاص بينهما ومحادثات تليفونية خاصة ممكن يحدث تجاوزات وحاجات غلط لان محدش بيشوف ولا يسمع المحادثات اللى بينهم .. وطول الوقت بيتكلموا وطبعا بحجة الشغل .
و بقيت ألاقى كلام زى اللى بين المتزوجين على تليفونه وفي رسائله والشريكه بقت تتجاوب معاه فى كلام ميصحش يتقال بينهم .. استغربت جداااا وكنت هموت من اللي شوفته
وطبعا زوجى بدأ يهملني ويقول لي شريكتى أهم منك وبقى يضربني عشان بسأله انت رايح مع شريكتك فين وبقى يسافر معاها محافظات مختلفة وكل دا اثر على بيتنا.
للأسف جوزي متمسك بالشراكه والموضوع أصبح صعب عليا جدًا وعايزة حل .. مع العلم إني محكتش مع حد من أهلي في الموضوع لاني مش عايزة أفضح زوجي قدامهم عشان العشره والأطفال اللي بينا .. بس نفسي الاقي حل اتصرف ازاي.
حل المشكلة
أولاً :- انت ست عاقلة عايزه تحافظي على بيتك.
ثانياً :- هو عنده سوء تصرف لأنه شايف مصلحة شغله والمكسب اللي بيجيله فوق أي اعتبار بالإضافة ان في واحده بتسلية.. بس متقلقيش هي مش أكتر من نزوة وهتعدى لأن مفيش واحد هيقبل يتجوز واحدة تتجاوز معاه هو شايف انه شغل وتسلية.. وطبعا عارف ان مراته أم عياله عاقلة وضامن وجودها .. بس لازم تاخدي بالك وتحطي خطوط حمراء كتير تحت ايه اللي خلاه يبص بره .. ايه اللي انتي مقصرة فيه مخليه متمسك اوووى بالشراكة دى .. لازم تبحثي جيدا على القصور عندك وابدئى صلحي ده .
ثالثاً :- أعمالي واجبات بيتك علي اكمل وجه وغيري من نفسك وغيري اللوك بتاعك حاولي تعملي جو مختلف في البيت وهو هياخد باله .. بس مع كل ده تحاولي تهمليه ولا تسأليه رايح فين ولا جاى منين وانك مش مهتمه بيه بس بالعقل .. وانك بتعملي كل ده عشان تغيرى مودك انتي .. وتعريفه انك تبسطي نفسك ما انت كمان مبسوط بره .. هو هيبدا ياخد باله .. والراجل لما بيكون محور اهتمام بيكون ضامن وجود اللي معاه .. لكن لما بيلاقي نفور وعدم اهتمام بيبدا يراجع حساباته.
رابعاً:- وده اخر حل لو متعدلش لازم تدخلي حد كبير من أهله هو يكون بيسمعله، وطبعا لاتنسي دائما دعائك له بالهداية .. وربما يصلح حالكم
