عفاف رشاد في حوار خاص مع عالم النجوم و طقوس رمضانية
إعداد وحوار / مايسة محمد عبد الحميد
عفاف رشاد ممثلة مصرية ولدت بمدينة القاهرة في عام 1957، وتخرجت من المعهد العالي للموسيقى “الكونسرفتوار” ، عملت في غالبية مشوارها الفني في الدراما التليفزيونية، من مسلسلاتها: آدم وجميلة، يا رجال العالم اتحدوا، نحن لا نزرع الشوك، نصف ربيع الآخر، بوابة الحلواني.
تزوجت من الفنان والمنتج سامي العدل ثم المنتج محمد السبكي.
ما هي الطقوس الرمضانية للفنانة عفاف رشاد؟
الطقوس اللى احنا عارفينها طبعا الصلاة والصوم وطبعا بحب أعمل الفطار في االبيت باستمرار ومش بحب حد يحط إيده في الأكل وانا اللى بدخل المطبخ وأشوف إيه اللى هاعمله على السفرة.
أول يوم رمضان بيبقي مع الأهل طبعا وبعد كدا بفضل يبقي عندى في البيت.
مش بفضل أخرج في أيام رمضان أروح فطار بره بحس بالشهر دا في البيت ونعمل الطقوس بتعتنا في البيت.
علاقة بينى وبين ربنا قراءة القرآن والصلاة والدعاء والتمنى
بالخير للأهل والأصحاب والجيران والدنيا ربنا يبارك فيها.
بتحبى تشاهدى إيه في التليفزيون في شهر رمضان؟
الحقيقة السنة دى بفضل أشاهد ساعة او ساعتين ومش بفضل أتفرج على دراما رمضان كلها.
بصراحة لاهاقدر أصلى ولا أقرأ قرآن ولا هاقدر أختم القرآن في رمضان ولا هاقدر أعمل أكل البيت خالص.
فانا بقول إن دا شهر في السنة وإن الأعمال هاتتعاد تانى أنا بركز مع ربنا في الشهر دا أقل حاجة.
إنما الأعمال هاتتعاد تانى مرة وأتنين لكن الشهر مش بيبقي كل الشهور فبحاول أستغله على قد ماقدر تكون العلاقة بينى وبين ربنا أكتر .
تحبي يكون مين معاكى علي سفرة رمضان؟
ابنى عمر لاننا في بيت واحد ومرتبطين ببعض جدا والاصدقاء المقربين ليا جدا والأهل طبعا.
ماالذي يميز رمضان بالنسبة للفنانة عفاف رشاد؟
رمضان أيامه جميلة جدا وحلوة وإعادة الذكريات وهو طفل وفي بيت الأهل ودايما بشتاق لأيام زمان وقعدتنا على السفرة مع امى وابويا واخواتى طبعا اللى عايش واللى توفهم الله ربنا يجعل مثواهم الجنة يارب العالمين بعد الام والاب والاخوات اللى توفوا خلاص رمضان يختلف عن الاول بس دى سنة الحياة. الموت هو الحقيقة الوحيدة اللى في حياتنا.
رمضان هو رمضان مش بيتغير بس احنا اللى ظروفنا اللى بتتغير.
بتفضلى مشاهدة الاعمال الدرامية ولا التاريخية؟
التاريخية يعنى احب اشوف التاريخية اللى فيها الثقافة حاجات أحب أعرفها أيام الفترة الاسلامية التاريخ عموما بحبه
وفي برامج مثلا باب الخلق لمحمود سعد من البرامج المحببه ليا جدا بيحكى المواضيع بشكل لذيذ ولطيف وفي برامج انا بحبها في رمضان.
الدراما انا مش بحب اتفرج عليها في رمضان حتى ولو ليا عمل في رمضان بتفرج عليه بعد رمضان.
مفتقده مين هذا العام ؟
امى ابويا واختى كل الاصحاب والاحباب اللى توفوا وفاتونا واللى سافروا المسافات بعدت ومفتقده ناس كتير بس ربنا يخلى ابنى بس حاسه السنه ديه يمكن عشان افتقدت ناس كتير جدا من الاصحاب الاهل والجيران بيجى رمضان نفتكرهم كانوا معانا السنة اللى فاتت او اللى قبلها بيجى علينا بحزن هو زى ماهو الدنيا اتغيرت والناس اتغيرت والحياة اتغيرت
ومبقاش فيه الرحمة والمودة والسؤال للاسف الفيس بوك يعنى والسوشيال ميديا بعدتنا عن بعضنا مثلا بنبعت رسايل.
كنا نتزاور ونتكلم في الفون بعد كدا رسايل. حتى الرسايل مبقناش نبعتها بقينا نبعت صورة بس ولو رمضان يبقي رمضان كريم.
لو صباح الخير ووردة مثلا من الصورة مبنكتبهاش حتى بعدنا عن بعض أتمنى إن العادات والتقاليد بتاعة زمان زي المودة والرحمة والتواصل بين الناس وبعضها في الحقيقة مش على الفيس بوك موجودة زى زمان والعزومات السنة ديه بصراحة فيها كميه من الحزن مش عارفة ايه سببه.
الدنيا بتخلص أتمنى إن الحياة تكون ألطف من كده وأحسن من كدا الحمد لله في رضا.
وفي كل حاجة يعنى الدنيا اتغيرت .
هل رمضان هذا العام يختلف عن رمضان العام الماضي؟
اه طبعا موضوع كورونا أختلفت معانا كلنا موضوع كورونا حاجة صعبة جدا جدا مخوفانا ومزعلانا وبتاخد ناس كتير وحبايب كتير مننا وطبعا ده عمرهم محدش بيسيب من عمره دقيقة او ثانية بس أسباب. الموت واحد وتعددت الأسباب رمضان السنة دي غير السنة اللي فاتت للأسف ربنا يشيل الغمة عننا ونرجع زي زمان والدنيا تبقي حلوة وجميلة.
