أريد حلاً… بقلم: نيفين نصار
انا بنت عندي 20 سنة ومطلقة وتم خطبتي لشخص آخر و جهزت فرش جديد كل حاجة جيباها جديد في بيقول انه مش هعمل فرح ولا جايب اي حاجه من الي المفروض على العريس وكمان إجمالي حاجتي ، بـ 250 جنية هو عاوز يكتب القائمة كلها حاجتي والحاجة بتاعته بـ 140 ألف بس ولما بابا كلمه .. ف بيقوله دا مطلقة 140الف كتير كمان عليها أنا واخدها مطلقو عشان مش تكلفني حاجة مع العلم أنه مطلق مرتين وعنده 34 سنة لو سمحتى اعمل ايه ياريت تفيدوني ؟
حل المشكلة
يا حبيبتي لازم تفسخي الخطوبة .. الجوازة دى محكوم عليها بالفشل من قبل ما تبدأ، والكتاب باين من عنوانه .. ده بيعايرك أنك مطلقة وعايز يقلل من قيمتك وقدام اهلك .. بكرة يحسسك انك مالكيش أي قيمة قدام الناس كلها هتعيشي في عذاب وفي الاخر هتطلقي .. وبعدين يعني هو مش شاب لم يسبق له الجواز ولكنه مطلق يعني عارف يعني إيه حياة لم تكتمل يعني المفروض يكون عايز استقرار ولكنه عايز يقلل من قيمة اللي قصاده .. وحتى لو شاب لم يسبق له الجواز لازم يحترمك و يراعي ربنا فيكي، لازم يكون عندك ثقة في نفسك وعارفه قيمة نفسك أنتي ست الستات مش معني انك اتطلقتي يبقى فيكي عيب .. ده أبغض الحلال عند الله الطلاق .. لما تفكري تتجوزى تانى متفكريش في جوازه والسلام .. فكرى انك تعيشي ملكة تعوضي الوجع والظلم اللي مريتي بيه وقلة القيمة .. تتجوزى واحد عارف قيمتك .. الجواز لا هو بالفلوس ولا بالمراكز ولا أنا جبت ايه وانتي جبتي ايه .. الواحده مش بتفكر تتطلق إلا إذا كانت مرت بحياة مسمومة كانت مؤذية لجميع أطرافها وكان يجب بترها، العلاقة الزوجية مبنية على المودة والرحمة والسكينة والطمأنينة.. ارتقوا بمعاملتهم وأحسنوا عشيرتهم واستوصوا بالنساء خيراً .
