بالبلدي كده .. بقلم: حمادة عبد الجليل خشبة
تعالي نتكلم مع بعض بصراحه شوية ، إحنا عندنا غلاء في الأسعار، طبعا عندنا غلاء شديد في الأسعار وكل يوم بتزيد عن اليوم اللي قبله ، الحكومه مقصرة ، نعم هناك تقصير من الحكومه في بعض الأمور ، ولكن تعالي نفهم مع بعض اسباب كل دا ايه.
الدولار مرتفع وبترتفع نتيجة ارتفاع الفائدة في البنك الفيدرالي الأمريكي نتيجة وجود تضخم شديد في أمريكا، وعلشان أمريكا ميهمهاش غير مصلحتها بس فقررت انها تحافظ على الدولار وترفع من سعره في دول العالم وتلم كل الدولار اللي موجود في الأسواق علشان تقضي على التضخم عندها، ونتيجه لارتفاع سعر الفائدة في البنك الفيدرالي بدأت البنوك المركزيه ترفع سعر الفائدة هي كمان، علشان تحاول تحافظ على الأموال الساخنه اللي عندها ومتخرجش بره،
طيب تعالي بقه نشوف الأسعار بترفع ليه؟ ، شيئ طبيعي نتيجة عدم وجود عمله صعبه (الدولار) أصبحت الدولة مش عارفه تستورد مواد غذائية من الدول اللي حضرتك ب تستورد منها زي الصين واكورانيا وروسيا وامريكا وخلافه، ليه علشان أمريكا لمت الدولار كله في البنوك بتعتها نتيجة ارتفاع سعر الفائدة هناك.
وطبعا ارتفاع الأسعار نتيجة التعويم الكامل للجنية من جانب والحرب الروسية الاكورانية وعدم وجود الدولار من جانب اخر.
لو قلنا الحكومه مقصرة هقولك انا معاك ان الحكومه مقصرة شوية ؟ في ايه بقه؟ لو احنا كحكومه شجعنا الاستثمار المحلي مش هقولك الأجنبي كمان، لا خلينا في المحلي بمعنى ان لو مجموعه من الشباب مثلا عايزين يعملوا مصنع إنتاج معين المفروض هنا الحكومه تقف معاه وتعفية من الضرائب بشرط أن المصنع ينتج يعني بالبلدي اشجع الإنتاج داخل الدولة وابعد بقدر الإمكان عن الاستيراد، يعني الحكومه تشوف الدولة بتستود ايه بكميات كبيره او ايه الاستهلاك الأكبر في الدولة وتحاول انها توفره جو البلد..
بس الشهادة لله الرئيس بيحاول يبذل كل جهده في بناء الدولة المصريه والبنك المركزي بيحاول ان يعدي الازمة الاقتصاديه دي بأقل خسارة ممكنة.
ناس كتير بتقول وانا سامعها دلوقتي، ليه ميخلوش رسوم قناة السويس بالجنية المصري،؟ اقولك انا وانا مش اقتصادي ولا اعرف حاجه عن الاقتصاد انا بتاع تعليم بس ههههه، هقولك اللي انا فاهمه وفهمته، انا ليه قايل من اول المقال ان العمله الصعبه اللي هي الدولار أمريكا بتحاول انها تخليه عزيز اوي في السوق يعني يكون صعب، أقوى من كده فبدأت انها تخفيه في البنوك عندها ، طيب الدولة هتجيب الدولار منين علشان تستورد بيه من الدول التانيه، وعلشان الدولار هو العمله الاقوى في العالم والمعتمده بين الدول فلازم تستورد وتصدر بالدولار.
علشان تستغني حضرتك كدولة عن الدولار وتخرج من تحت عباءته لازم الدول اللي هتستورد منها متكنشي محتاجه دولار ولا عايزه تتعامل بيه، ودا اللي عملته روسيا مع مصر من يومين قالت لمصر علشان تستوردي حاجه من عندنا تعاملي معانا بالروبل الروسي واعتمد الجنية المصري كعملة اساسيه في البنك المركزي الروسي ومصر اعتمدت الروبل في البنك المركزي المصري كعملة اساسيه في بنوكها، وبكده بتحاول الحكومه انها تخرج عن عباءة الدولار شويه شوية، علشان كانت مصر بتستورد من روسيا بحوالي ٥ مليار دولار كل سنه بكده هنوفر عملة الدولار دي وهنخف الضغط عن الدولار.
واحد بقه يطلع ذكي ويقول طيب مصر هتجيب الروبل منين؟ دا سؤال ذكي فعلا وهجاوب لك عليه عندنا في مصر لو لاحظت السياحة هتلاقي اكتر السياح في مصر هم الشعب الروسي فالسايح هيجيب عملته معاه ويحولها مصري في مصر، يبقى عملة الروبل هنجيبها من السياحة الروسيه وكل الدول اللي بتتعامل مع روسيا زي منظمة البريكس .
ندعي بقه ربنا انه يرفع عنا الغلاء ويبعد عنا جشع التجار ويحمي مصر ورئيس مصر وتحيا مصر دائما وابدا
