جمعه الصياد مصور المشاهير وأفضل مصور لعام 2021
حوار: نيفين نصار
فن التصوير من اجمل وارقي الفنون لأنه يعتمد على الإحساس قبل الضغط لالتقاط الصورة، ويستطيع المصور من خلال اعماله ان يدون كل ما يود قوله في رؤية البصر عند النظر للصور، ويأتي دورنا لنظهر لعشاق الفن والابداع واحد من من استطاع أن يعطي لفنه جمالا وحضور متميز بين نجوم الفن والإعلاميين.
جمعه الصياد هو صاحب الحضور المميز أمام عدسة الكاميرا عشق النظر فيها فاعطته كل ما يتمنى، هو مصور المشاهير كما لقبه الجمهور.اجتهد وسعى للوصول إلى الإبداع، وقد تم تكريم النجم الشاب جمعه الصياد المصور السينمائي فى مهرجان همسة السينمائي كأفضل مصور لعام 2021.
والجدير بالذكر أن جمعه الصياد احب التصوير وتعلم مبادئ الاحترافية في التصوير من أخيه وبدء بفكرة التطوير لـ نفسه حتي وصل الي الإحترافية ليكون ” مصور المشاهير “
و لنا معه حوار حتي نتعرف عنه عن قرب لنسعد بصحبة ويسعد هو معنا بالفضفضة
عرفنا بنفسك؟
أنا جمعه عبد العزيز الشهير بجمعه الصياد مصور
متي بدأت العمل بالتصوير؟
بدأت التصوير من 2008 طبعا أنا مكنتش أعرف أى حاجة عن مجال التصوير خالص واللي علمنى التصوير عن جداره وطبعا الفضل ليه بعد ربنا هو أخويا الكبير وصاحب عمرى وائل الصياد وفعلا مهما أتكلم عنه مش ممكن أوفيه حقه ولا غلاوته عندى .
من هو مثلك الأعلي واللي بيدعمك؟
وائل أخويا هو مثلى الأعلى فكل حاجه لأن هو اللي وصلني لأول الطريق .
وطبعا الدعم الكبير كان لى لست الحبايب أمي وكل الفضل يرجع ليها وهيا مثلى الأعلى .. وبفضل دعوتها انا وصلت للمستوي ده
هل حصلت على تكريمات؟
حصلت على عدد كبير من التكريمات من كذا مهرجان وآخر تكريم كان من مهرجان إيجى فاشون ، مهرجان همسة السينمائي كأفضل مصور لعام 2021 ، وغيرها من المهرجانات
وأهم تكريم حصلت عليه من الجمهور هو لقب مصور المشاهير .
طموحك إيه؟
طموحى أن أوصل لأعلى من كده بإذن الله و أفضل دائما عند حسن ظن الناس وبسعي واجتهد في مجالي أكتر .
وانا حاليا بحضر لمهرجان فاشون WG علي مستوي عالمي واعلنت عن المهرجان ده من فتره وحاليا نجهز له ويكون خاص بعالم الأزياء والموضة.
حققت إيه في فترة عملك بالمجال؟
والحمد لله فى الفتره دى عملت حاجات كتير منها شركة الصياد جروب للتصوير الفوتوغرافي والسينمائي وطبعا كل ده بتوجهات أخويا الكبير وائل الصياد وطبعا مش ناسي فضل اى حد فى حياتى سندنى ولو بكلمه.
هل وجدت صعوبات او مريت بظروف صعبه خلال مشوارك؟
مريت بظروف وحشه كتير وفيه كتير أوي بيتمني فشلى وفيه كتير بيحاربنى بس طبعا أنا أقوي بالله من كل ده لأن أنا مؤمن جدا بأن الناجح دايما بيتحارب ولا مكنش نجح في حياته وأنا بحب أسمع كل إلى بيتقال عليا عشان دايما اكون ناجح في حياتى وبإذن الله اللي جاى أقوي.
