كله يجمع بقلم / حماده العسكري
كله يجمع
الِلي كان بينهش في سيرتي
واللي بيشوه في صورتي
واللي جه عليا وأذاني
واللِي إداني درس يوجع
كله يجمع
في كشف كاتب أساميكم
اللي يسمع إسمه فيكم
يرفع إيده يقول أفندم
مايتكلمش يسكت ويسمع
النهارده مجمعكم
أنا جاي وناوي أسمعكم
كلام يهنيكوا ويوجعكم
هخلص منكو سنين حزني
محدش عنكم هيحوشني
مفيش حاجه هتنفعكم
النهارده أنا ناويلكم
هطلع عليكم عمايلكم
كنت كتير بعديلكم
وكل ماأقسى قلبي يحن
في الرايقه داوشني إتصالات
حلوه القعده والخروجات
ووقت الشده والأزمات
لا حد بيسأل ولا بيرن
كنتوا عليا بخساره
وكنت متمسك بيكم
فاكر جدعنتي شطاره
آتاريها ضعف في عينيكم
كنت بخاف على زعلكم
في عز إنشغالي بفضلكم
كنت بطبطب على حالكم
وياريته كان طامر فيكم
كنتوا معايا بتقلوا
وفي سيرتي كنتوا بتتسلوا
بعد اللي عملته ده كله
تبيعوني وأنا كنت شاريكم
العيب مش فيكم كان فيا
أنا اللي عملت ليكم سعر
كأن كان معمي عينيا
كنت بقول فيكم شعر
