ياشايل الهم …… بقلم الشاعر الغنائى : حماده العسكري
ياشايل الهم ظهرك بقى محني
كتر الدق ع الحديد يتني
شكلك كبير عديت كتير سنك
سنين حياتك عليها ليه بتجني
شيل الهموم لا جايب ولا مودي
عـ الجمر دوس متخافش هتعدي
فارقت ناس من الأساس مش ليك
اللي خان واللي كان مادي
أقف وقوم إدي الهموم ضهرك
دول شمتانين مستحلين قهرك
لازم تبان زي الجبل واقف
شيل الهموم هناك وجاب أخرك
كتر الهموم بتهد ما بتبنيش
بتخوفك من اللي جاي بكره
كفاياك جروح في حاجات تروح ماتجيش
إلحق وعيش دى الحياه فتره
وتعمل إيه وانت مش بإيديك
بتحلم تكون ومفيش إيدين طايله
يفيد بإيه حزنك ودمع عينيك
الدنيا عايزه مسايسه ومحايله
دايره مقفوله تايه فيها
قول يارب يبانلك المخرج
اللي خلقك عمره ما يسيبك
سيبها لله مسيرها يوم تفرج
إقف وقوم إدي الهموم ضهرك
دول شمتانين مستحلين قهرك
لازم تبان زي الجبل واقف
شيل الهموم هناك وجاب أخرك
كتر الهموم بتهد ما بتبنيش
بتخوفك من اللي جاي بكره
كفاياك جروح في حاجات تروح ماتجيش
إلحق وعيش دى الحياه فتره
