قصيدة البحر بقلم: حماده العسكري
البحر ملوش كبير والموج مجنون
يبقى هادي وموجه حنون
فجأه يقلب مش مضمون
خطاف عيون في النظره سحر
لؤلؤ مرجان أسماك ألوان
مليان تعابين وقروش وحيتان
كبير وف عين سمك غلبان
يبقى صغير زي الجحر
ناس في قارب وناس في يخت
وناس غريقه ملهومش بخت
وناس مركبها في البحر تاه
ناس في وسط البحر تنط
وناس نفسها توصل للشط
مستنين طوق النجاه
ناس تحبه وناس تخاف
اللي سمع غير اللي شاف
وهو ده بحر الحياه
واحد قاعد في أملاكه
في اليوم يصرف كام باكو
وصياد قاعد بشباكه
مستني رزق عياله
ناس في الميه تتمتع
وناس أنفاسها تتقطع
ماشيه الدنيا وف الآخر
يبقى الوضع على حاله
ناس في قارب وناس في يخت
وناس غريقه ملهومش بخت
وناس مركبها في البحر تاه
ناس في وسط البحر تنط
وناس نفسها توصل للشط
مستنين طوق النجاه
ناس تحبه وناس تخاف
اللي سمع غير اللي شاف
وهو ده بحر الحياه
