الفنانة مريم نشأت في حوار لـ” عالم النجوم “: بتمنى يكون عندي أكاديمية رسم كبيرة
حوار: أحمد الدخاخني
مريم نشأت الشرباصي, فنانة تشكيلية شابة من بنات محافظة الدقهلية, تخرجت من كلية الآداب قسم اللغة الفرنسية بجامعة المنصورة, والتي تبلغ من العمر 23 عاماً, فمنذ طفولتها وهي تمتلك موهبة الرسم وقامت بتنميتها وتعمقت فيها عندما كبرت, وتتفنن ” مريم ” بريشتها في رسم لوحات فنية تعبر عن المناظر الطبيعية, وتبدع في تصميم صور الأشخاص, ورسم الشخصيات الفنية أبرزهم تصميم لوحة فنية للفنان أحمد العوضي.
وفي حوار خاص تواصلت ” عالم النجوم ” مع الفنانة التشكيلية مريم نشأت, للحديث عن تفاصيل بداية اكتشافها لموهبة الرسم وعن الصعوبات التي كانت تواجهها في مشوارها الفني, بجانب أحلامها الكبيرة التي تسعى لتحقيقها, كما يلي:
كيف اكتشفتي موهبتكِ في الرسم ؟
الموهبة موجودة عندي من الطفولة بس بدأت أتعمق فيه أكتر فترة الجامعة.
ما هي الصعوبات التي كانت تواجهكِ في مشوارك الفني ؟
أي فنان في بداية مشواره الفني لازم يلاقي صعوبات وخاصة لو بيرسم بورتريه لأنه محتاج صبر ومجهود وتركيز كبير عشان يطلع الشبه بالضبط، وجاتلي دعوات كتير من معارض بس للأسف ماكنتش بروح لأنها بعيدة جدا عني فكنت بضيع مني فرص حلوة.
ما هي الأدوات التي تستخدميها في الرسم ؟
بستخدم معظم الماتريال رصاص وفحم وزيت وديچيتال.
كم من الوقت تستغرقين في رسم صورة ؟
على حسب الخامة والصورة اللي بشتغل عليها, يعني فيه لوحات بتكون فيها تفاصيل كتير فبتاخد وقت كبير, لو بورتريه بسيط يبقى في رينج ٥ ل ٦ ساعات.
ما هي الصورة التي تعتزي برسمها ؟
أول بورتريه اشتغلته في حياتي وطلع الشبه مظبوط بعد محاولات كتير فاشلة فكان إحساس حلو وعشان كده بعتز بالبورتريه ده.
من هم أكثر الناس تشجيعاً ودعماً لكِ ؟
بابا ” نشأت الشرباصي” وماما ” عزة داوود ” أكتر إتنين بيدعموني مادياً ومعنوياً وأنا حابة أشكرهم هنا وأقولهم إني عمري ما كنت هوصل للي أنا فيه دلوقتي لولا دعمهم ووقوفهم جنبي.
هل حصلتي على جوائز أو تكريم ؟
اتكرمت في معرض مهرجان ” صحبة فن ” في محافظة دمياط, وشاركت في مسابقات رسم أون لاين وأخدت مركز أول.
ما هي أحلامكِ الكبيرة التي تسعين لتحقيقها ؟
بتمنى يكون عندي أكاديمية رسم كبيرة وأعلٌم فيها كل أنواع الفنون ويكون عندي معرض خاص, وأعمل لوحات عالمية ويكون إسمي معروف في المجال.
