بعد فترة من الفراق.. بقلم: حمادة العسكري

بعد فترة من الفراق
إلتقينا وسط ناس
لا حس قلبى بإشتياق
ولا فيا إتحرك إحساس
كنت عادي و بطبيعتي
كأن حبه فيا مات
بعد وقت بصيت في ساعتي
قولت أمشي الوقت فات
مشيت يادوب خطوتين
ذكريات كل السنين
رايحه جايه قصاد عينيا
عايشه فيا الذكريات
م الحنين والشوق بكيت
وأنا أفتكرت إني نسيت
آتاري قلبي ضحك عليا
علشان أقعد بالساعات

كانت عيون الناس عليا
وهو إيده في حضن غيري
وأنا كنت عادي رايحه جايه
لو شوفته أغير خط سيرى
وإن جات عيني في عينه ثانيه
أداري عيني عن عينيه
وأشغل بالي بحاجه تانيه
لا كان ليا ولا كنت ليه
مشيت يادوب خطوتين
ذكريات كل السنين
رايحه جايه قصاد عينيا
عايشه فيا الذكريات
م الحنين والشوق بكيت
وأنا أفتكرت إني نسيت
آتاري قلبي ضحك عليا
علشان أقعد بالساعات