مجدي سعد.. شاب عشريني يتفنن في رسم لوحات خادعة كأنها واقعية
حوار: أحمد الدخاخني
مجدي سعد, شاب يمتلك موهبة الرسم من أبناء محافظة دمياط, وهو حالياً يدرس بكلية السياحة والفنادق بجامعة المنصورة, والذي يبلغ من العمر 22 عاماً, ويبدع ” مجدي ” في الرسم على الأرض والحائط ويتقن في تحويل الفحم إلى خطوط لوحات ثلاثية الأبعاد بأسلوب كما لو كانت الرسمة تعطي صورة حقيقية كحفرة يخشى أحد أن يتقرب منها حتى لا يسقط فيها, وصورة أخرى كأنها منزل حقيقي يستطيع الدخول والخروج منه كيفما يشاء, هذه الأفكار الفنية يتفنن فيها الرسام الشاب ويعرضها على السوشيال ميديا قد لا توجد مثلها على مستوى العالم العربي وأثارت إعجاب ملايين من متابعيه عبر التيك توك, ويسعى نحو تطوير ذاته في عالم الفن.
وفي حوار خاص تواصلت ” عالم النجوم ” مع الشاب العشريني مجدي سعد, للحديث عن بداية اكتشافه لموهبة الرسم, وعن الصعوبات التي كان يواجهها أثناء ممارسة موهبته, وعن الهوايات الأخرى التي كان يمارسها بجانب الرسم, وختاماً بمعرفة أحلامه الكبيرة التي يسعى لتحقيقها في المستقبل, كما يلي:
كيف اكتشفت موهبتك في الرسم ؟
هي موهبة عندي من أنا صغير لأن والدي ووالدتي بيحبوا الرسم فأنا أخدها منهم ودايماً كنت بحب الرسم من صغري.
ما هي الصعوبات التي كنت تواجهها في مشوارك ؟
بالنسبة للصعوبات فهي بتكون في المحتوى اللي بقدمه لأن الرسمة بتاخد مني تقريباً من 3 لـ 5 ساعات, فدي حاجة صعبة جدا دا غير المونتاج, وف الأول كان الموضوع صعب لأني بقدم محتوى مش موجود في الوطن العربي فمكنتش بلاقي أفكار جديدة له عشان أطور بس مع الوقت بقيت انا اللي بطلع أفكار جديدة.
كم من الوقت تستغرق في رسم أو تصميم صورة ؟
الوقت اللي بستغرقه للرسم بيكون على حسب الرسمة بس أقل رسمة ممكن تاخد مني ساعتين بالمونتاج, وفي رسمة قعدت فيها قبل كدا 8 ساعات, بس في العادي ممكن أقعد في الرسمة من 3 ساعات لـ 5 لأن بيبقي فيه كذا مرحلة زي مرحلة التصميم وبعد كدا التظليل بالفحم والرمل ودي بتكون صعبه جدا وبعد كدا التصوير وآخر حاجه المونتاج.
ما هي الهوايات الأخرى التي تمارسها ؟
الهوايات اللي بمارسها غير الرسم منها الكورة وكنت مهتم بالموضوع ده أوي وكنت بلعب في أندية كويسة ومعروفة, ودخلت فترة برضه التمثيل وكنت باخد ورش.
من هم أكثر الناس تشجيعاً لك ؟
بالنسبة لأكتر ناس بتشجعني البيت هنا كله بيشجعني والدي ووالدتي وإخواتي طبعاً ومعظم أصحابي القريبين مني.
هل حصلت على جوائز أو تكريم ؟
تكريمات كتير كنت بدخل مسابقات رسم وكنت باخد تكريمات فيها وطبعاً في المدارس والكلية اللي أنا فيها دلوقتي اتكرمت كذا مرة عشان موضوع الرسم ده لأني كنت بشارك في حاجات تبع الكلية.
ما هي أحلامك الكبيرة التي تسعى لتحقيقها ؟
أحلامي طبعاً عايز أطور من نفسي أكتر وأكون معروف وأكبر المحتوي اللي بقدمه يوصل لعدد كبير جوه مصر وبره مصر وعايز برضه أدخل مجال التمثيل وأبقى متواجد فيه برضه.
