منة جلال تكشف عن طقوسها الخاصة في رمضان وتهنئ الجميع بقدومه

 

إعداد وحوار/ دعاء نصر 

منة جلال فنانة شابة موهوبة بالوراثة ، من عائلية فنية متميزة ، والدتها الفنانة سعيدة جلال وخالها الفنان شفيق جلال ، درست في المعهد العالي للفنون المسرحية، وشاركت بالتمثيل في عدد كبير من المسلسلات التليفزيونية. منها: ” أصحاب المقام الرفيع، حكايات المدندش، جنة ونار، بالشمع الأحمر، المرافعة ، رمضان كريم “
وتألقت في الفيلم القصير الذي لاقى نجاح ساحق “اللعبة الأخيرة ” الذي عرض على اليوتيوب وحقق نسب مشاهدة عالية. وكان آخر أدوارها دور نعمة في مسلسل حواديت الشانزليزية الذي لقي نجاحا كبيرا وتميزت ولفتت الأنظار .

أيه طقوسك الخاصة اللى دايما بتدومي عليها في شهر رمضان الكريم؟

طقوسي في رمضان طبعا كانت طقوسي حاجة تانية غير طبعا الايام اللي بنمر بيها حاليا بتاعت كورونا بس طقوسي مابتتغيرش بيت و الصوم والصلاة قرب من ربنا ، طقوس متغيرة شوية عن الطقوس اللى بنعملها برة حياتنا بقعد اتفرج على التلفزيون وبطبخ كتير جدا ، بحب اتفرج على التلفزيون بحب اطبخ كثير جدا و بحب أقضي رمضان مع امي وكده كده يعني ما عنديش طقوس ثانيه .

كنتي ايه في رمضان زمان افتقدته في رمضان دلوقتي ؟

اللي كنت بحبه في رمضان زمان وافتقدته في رمضان دلوقتي ، الفوازير بتاعت رمضان و الف ليله وليله
هما دول اللي انا افتقدتهم واجواء بقى الشارع واجواء رمضان والبومب اللي كنت بفرقعه زمان وانا صغيرة .

ايه أكتر أكلة بتحبي تأكليها من وأنتي طفلة في أول يوم رمضان ؟ واكتر اكلة بالنسبالك بتميز شهر رمضان ؟

اكتر اكله بتحبها من وانا في صغيرة هي صينيه البطاطس بالفراخ او باللحمه والرقاق دول أكتر حاجه بحب اكلها اول يوم رمضان .. أما اكثر اكله بتميز رمضان بالنسبة لى بصي مش عارفه بس هو كل الاكل
انا بطبخ طول السنة عشان كده ما بيبقاش عندي اكله مميزه قوي في رمضان باكلها لكن انا طول السنه .. بس هو لازم حاجات معينه كده عصير قمر الدين والخشاف بقى او التمر هندي والخروب و الحاجات دي.

أيه اللي كان بيشدك في التلفزيون و كان بيحسسك أن رمضان جه أما بتتفرجي عليه ؟ وايه رأيك في اللي بيتقدم في رمضان دلوقتي ؟

اكثر حاجه في التليفزيون تتفرج عليها مسلسلات رمضان طبعا وطبعا اللى بيتعرض في رمضان دلوقتي في مختلف كتير كتير عن رمضان زمان .

تفتكري هيكون في تراويح ولمة العيلة السنة دى ولا الوضع اللى احنا في بسبب كورونا هيستمر ؟

لا معتقدش في تراويح طبعا ولا لمة العيله بس عشان الظروف اللي احنا بنمر بيها كلنا فيها والله اعلم احنا هنعمل ايه ربنا يستر ويعديها على خير إن شاء الله.

منة جلال تحبي تقولي أيه لمحبينك وللشعب المصري بمناسبة قدوم شهر رمضان؟

أحب أقول للشعب المصري ربنا يارب يقوينا على المحنة اللي احنا فيها ده ان شاء الله هتعدى على خير ويارب نقعد ندعي كتير عشان المحنة دى تزول ونرجع تانى نستثمر و نرجع تانى لشغلنا ، ونرجع تانى نشوف اكل عيشنا بدل القعده اللي احنا فيها دي بس دي حاجه مضطرين ليها وخارجة عن إرادتنا .. وكل سنة وكلك الشعب المصري بخير ورمضان كريم على الجميع يارب .